Nga këshilltarët e Metës, te ish-drejtori i LSI/ Dalin emrat shtesë për KLSH-në

17 Tetor 2018, 11:06, Aktualitet CNA

Drejtimi i Kontrollit të Lartë të Shtetit duket se do të jetë beteja e radhës mes presidentit Meta dhe kreut të PD-së, Lulzim Basha.

Kujtojmë këtu se dy ditë më parë, CNA.al zbuloi se dy kandidatë të mundshëm për të marrë drejtimin e KLSH-së, janë janë Helga Vukaj dhe Bahri Shaqiri.

Të dy emrat i përkasin opozitës zyrtare. Helga Vukaj, produkt i Republikës së Re, dhe ish ministre e Financave në 3 muaj bashkëqeverisje Rama-Basha. Ndërsa Bahri Shaqiri, ish-kreu i SHISH, aktualisht këshilltar i Presidentit Ilir Meta, por një emër me eksperiencë administrative dhe mjaft me përvojë.

Por, ndërkohë gazeta ?Sot? ka zbuluar të tjerë emra që konkurrojnë midis tyre për të marrë postin e Bujar Leskajt. Ajo që bie në sy është se shumica e këtyre emrave njihen si mbështetës të Ilir Metës.

Përvec Bahri Shaqirit dhe Helga Vukaj, sipas kësaj gazete kandidaturat momentale për kreun e ri të Kontrollit të Lartë të Shtetit janë edhe: Anastas Angjeli, Bajram Muçaj, Ilirian Muho dhe Alqi Bllako.

Por cila është biografia e emrave që pretendojnë të marrin drejtimin e KLSH? Të gjithë e njohin Anastas Angjelin si deputetin e Partisë Socialiste, por ai njihet po ashtu si një mik mjaft i afërt i Metës. Angjeli ka lindur në vitin 1956 në Sarandë dhe përgjatë vitesh ka mbajtur një sërë postesh të rëndësishme, si: ministër Financash, ministër Ekonomie, ministër i Çështjeve Sociale, Zv. Guvernator i BERZH-it /Londër, këshilltar në Bashkinë e Tiranës, ndërsa momentalisht zotëron Universitetin Mesdhetar dhe është deputet i Kuvendit të Shqipërisë.

Bajram Muçaj është drejtori ekzekutiv i ?Fondit Besa?, një ndër institucionet më të mëdha mikrofinanciare në Shqipëri. Ai është nga Skrapari, nga vendlindja edhe e vetë presidentit Meta. Edhe Ilirian Muho është një emër mjaft i afërt me LSI. Ai ka mbaruar studimet për drejtësi dhe gjatë kohës kur LSI ishte në qeveri me PD, ka qenë përfaqësuesi i LSI në Komisionin Qendror të Zgjedhjeve. Pasi u prish aleanca, Muho u largua nga KQZ, ndërsa demokratët asokohe e kanë akuzuar si të lidhur me krimin.

Në vitin 2013 ai u emërua Drejtor i Përgjithshëm i Hipotekave. Ndërsa sa i takon kandidatit të pestë, Alqi Bllakos, momentalisht është Sekretar i Përgjithshëm në Presidencë dhe e ka marrë këtë detyrë kur Meta u vu në krye të Presidencës.

Duhet theksuar fakti se teksa gara është ende e hapur dhe mbetet të shihet nëse do të ketë pretendentë të tjerë. Megjithatë mbetet të shihet se çfarë do të ndodhë në ditët në vijim.

Betejë në kampin opozitar/ Lufta për KLSH-në, ?minë me sahat?

Lufta Meta-Basha, për KLSH-në

Ekskluzive-Kreu i KLSH, betejë Basha-Meta/ Zbulohen dy kandidatët, ja ku shkon Leskaj