Ndryshon ligji për dëmshpërblimet i ish-të përndjekurve

30 Gusht 2018, 09:17, Aktualitet CNA

Qeveria ka vendosur të ndryshojë sërish ligjin për dëmshpërblimet për ish-të përndjekurit që janë ende gjallë, apo familjarët e tyre.

Sipas propozimit të tre ministrave: atij të Financave dhe Ekonomisë, asaj të Drejtësisë dhe asaj të Shëndetësisë dhe Mbrojtjes Sociale, Këshilli i Ministrave ka kaluar dje një projektligj, i cili do të kalojnë për miratim në Kuvend.

Qeveria kërkon që ky projektligj të kalojë me procedurë të përshpejtuar në Parlament.

Sipas projektligjit, propozohet që të shtohet një pikë e veçantë me këtë përmbajtje: ?Në rastin kur e drejta e përfitimit të dëmshpërblimit financiar përfundon me mbylljen e rrethit të familjarëve që nuk jetojnë, të përcaktuar sipas pikës 1 të këtij neni, dëmshpërblimi financiar, për pjesën takuese të tyre, kalon në buxhetin e shtetit?. Në kuptim të këtij ligji, me familjarë deri tani nënkuptohen, pavarësisht nga rregullime të tjera ligjore, vetëm pasardhësit direktë: bashkëshortja, fëmija, fëmijët, vëllezërit dhe motrat. Më parë, në radhën e përfituesve ishin listuar edhe nipërit dhe mbesat e ish-të përndjekurve që nuk janë gjallë.

Në ligjin aktual propozohen ndryshimet si më poshtë. Së pari, kufizohet shuma e këstit. Sipas p/ligjit, në bazë të buxhetit vjetor të vënë në dispozicion, fondi i dëmshpërblimit të ish-të dënuarve politikë nga regjimi komunist do të ndahet në mënyrë proporcionale për të gjithë përfituesit, me kusht që kësti i dëmshpërblimit të mos jetë më i madh se një milion lekë.

Së dyti, për të gjitha subjektet përfituese parësore, kur vlera totale e dëmshpërblimit është mbi tetë milionë lekë, do të vijohet me pagesën e këstit pasardhës deri në shpërndarjen e plotë të shumës së miratuar.

Në rast se vlera totale e miratuar për të gjithë përfituesit është deri në një milion lekë, shpërndarja e dëmshpërblimit do të kryhet me një këst të vetëm, pavarësisht fazës në të cilën ndodhet shpërndarja e dëmshpërblimit.

Së treti, do të përfitojnë ata që kanë këst më të ulët për të marrë. Kështu, thuhet se ?me kryerjen e pagesës së dëmshpërblimit, për të gjithë përfituesit, brenda këstit më të ulët, fillon pagesa e këstit pasardhës. Ky mekanizëm do të përsëritet deri në shpërndarjen e plotë të shumës së dëmshpërblimit?.