E fundit!

07:15 Sociale

Rriten temperaturat/ Moti për ditën e sotme

Ditën e sotme vendi ynë do të mbetet nën ndikimin e masave...

Rama “dush të ftohtë” ministrave dhe deputetëve/ Paralajmëron shkarkime

29 Qershor 2018, 07:39, Aktualitet CNA

Kryeministri Edi Rama nuk ka më asnjë dilemë për ndryshimet në qeveri. Në prill ai u shpreh nga Asambleja e PS se shtatori do sjellë rishikim të kabinetit, por vendimi i BE për negociatat duket se ka ndryshuar komplet planet e shefit të qeverisë.

Një ditë më parë e theksoi se Rama paralajmëroi ministrat dhe deputetët se mund të ketë ndryshime në qeveri. Dje kryeministri e ka konfirmuar një gjë të tillë në mbledhjen e grupit parlamentar.-raporton gazeta Sot.

Pak para se të mblidhej seanca plenare, shefi i qeverisë mblodhi në takim të gjithë deputetët dhe u dha një sërë porosish. Burime të sigurta i thanë gazetës se Rama ka kërkuar angazhim total nga të gjithë me qëllim përmbushjen e kërkesave të BE. Vendet anëtare kanë dhënë garanci se në qershor 2019 do ketë hapje të negociatave, por sigurisht do ketë monitorim nëse do luftohet korrupsioni, do zbatohet reforma në drejtësi dhe do përmbushen kushtet e tjera. Për të përmbushur të gjitha kërkesat, duket se kryeministri reformat do i nisë nga qeveria.

Në mbledhjen e djeshme Rama ka qenë i prerë, pasi ka thënë se tashmë qeveria duhet të ndezë motorët për të përmbushur detyrimet dhe kjo do sjellë nevojën e ndryshimeve në kabinet. Burimet i thanë gazetës se kryeministri nuk ka pasur asnjë dilemë, duke thënë se disa emra do të duhet të ikin dhe të emërohen persona të tjerë që mund të japin një kontribut akoma dhe më të madh. Ashtu si një ditë më parë, kryeministri ka bërë të ditur se emrat që do iknin dhe ata që do të vijnë do i prezantojë në mbledhjen e Asamblesë, e cila do mbahet së shpejti.

Po në mbledhjen e djeshme, shefi i qeverisë ka informuar deputetët se turi i bashkëqeverisjes është mbyllur dhe tani puna është drejt hartimit të raporteve përfundimtare. Edhe këto raporte do të prezantohen në Asamble, ku dhe prej asaj që do dalë aty do varet fati i disa ministrave. Një tjetër porosi e tij ka qenë që çdo deputet të reagojë për negociatat dhe të mos lejohet PD të gënjejë shqiptarët se BE dha vendim negativ.