web counter
LEXO PA REKLAMA!

SHKARKO APP

App Store
Google Play

Komisioni i Vetingut përshpejton proçedurat/ Gati ngritja e KLGJ, KLP dhe SPAK

29 Qershor 2018, 07:20, Aktualitet CNA

Komisioni i Pavarur i Kualifikimit, pas vendimit të BE për negociatat me Shqipërinë, ka përshpejtuar procesin e rivlerësimit.

Nisur nga kërkesa e BE, që vendi ynë duhet të bëjë më shumë progres me reformën në drejtësi dhe procesin e vetingut, KPK ka vendosur që të shtojë ritmin e punës, duke zhvilluar 4-5 seanca dëgjimore në një javë.-raporton gazeta Sot.

Nëse vëzhgohen njoftimet e bëra publike në faqen zyrtare të KPK, vihet re se për 3 ditë do të zhvillohen 4 seanca dëgjimore. Më konkretisht, ditën e hënë do të përballet me trupën gjykuese edhe një herë gjyqtari i Gjykatës së Tiranës, Artan Lazaj, pasi seanca e djeshme u shty.

Më pas, të martën do të zhvillohen dy seanca gjykuese, ku në orën 10 do të japë llogari kryeprokurorja e përkohshme Arta Marku, ndërsa në orën 11 prokurori i Prokurorisë së Apelit Tiranë, Luan Kaloci.

Seanca e radhës dëgjimore do të zhvillohet të mërkurën, ku përballë trupës gjykuese do të dalë gjyqtarja e Gjykatës së Tiranës, Alma Brati. Siç duket, KPK ka vendosur të zbatojë rekomandimet e BE me qëllim që negociatat në 2019 të jenë diçka e prekshme.

Duhet theksuar fakti se KPK së fundmi po kalon në sitën e vetingut të gjithë kandidatët për Këshillin e Lartë të Prokurorisë dhe Këshillit të Lartë Gjyqësor dhe nëse vijohet me këto ritme pritet që seancat dëgjimore me ta të përfundojnë rreth mesit të korrikut.

Në këtë mënyrë në shtator pritet që KLGJ dhe KLP të jenë gati, duke i hapur kështu rrugë më pas edhe ngritjes së Strukturës së Posaçme Antikorrupsion dhe Byrosë Kombëtare të Hetimit. Sipas ligjit, këto dy të fundit mund të ngrihen dy muaj pasi KLGJ dhe KLP të jenë gati, ndaj pritet që rreth nëntorit në vend të funksionojë edhe SPAK e BKH për të luftuar korrupsionin në nivele të larta.





Lajmet e fundit nga