Grupi i “baronit të drogës”/ Zbulohen linjat e trafikimit

20 Maj 2018, 09:29, Aktualitet CNA

Dy muaj pas arrestimit në Turqi të Met Kananit, të cilësuar nga mediat turke si “baroni i drogës” policia e shtetit me 11 maj 2018, njoftoi për shkatërrimin e grupit të strukturuar kriminal, i cili akuzohet se ka trafikuar drejt vendeve të BE-së tonelata të tëra droge.

Në krye të grupit sipas policisë ishte Met Kanani.

CNA.al ka siguruar dosjen hetimore që ka në duar Prokuroria e Krimeve të rënda dhe ditë pas dite, do të sjellë detaje, se cilat ishin indiciet që çuan organin e akuzës në nisjen e hetimeve dhe se si ranë në kurth trafikantët.

Prokuroria pranë Gjykatës së Shkallës së Parë për Krime të Rënda në vitin 2017, ka regjistruar procedimin penal nr.54 /2017, në kuadër të hetimeve për veprat penale “Trafikim narkotikësh”, ?Krijimit të grupit të strukturuar kriminal? dhe “Kryerja e veprave penale nga grupi i strukturuar kriminal të parashikuara nga nenet 283/a12. 333/a dhe 334 të Kodit Penal.

Ky procedim penal është rregjistruar mbi bazë të informacionit të paraqitur nga policia gjyqësore, sipas të cilës disa shtetas në bashkëpunim me njëri-tjetrin kanë në qendër të veprimtarisë së tyre trafikim e narkotikëve.

Sipas Prokurorisë, nga studimi i materialit referues si dhe nga hetimet e kryera ka rezultuar se disa shtetas shqiptarë nga Shqipëria në bashkëpunim me shtetas të tjerë jashtë Shqipërisë, janë organizatorë të një grupi kriminal ku bëjnë trafikim lëndësh narkotike.

Shtetasit Met Kanani, Bilbil Heqimi, Arvanit Ulndrej etj dhe shtetas të huaj dyshohen se merren me trafikim të lëndëve narkotike të llojeve heroinë, kokainë dhe kanabis sativa, kryesisht në linjat e trafikimit Turqi-Greqi-vendet e BE-së.

Prokuroria dyshon se ata trafikojnë heroinë në shtetet Turqi-Maqedoni-Shqipëri-vendet e BE-së dhe kanabis sativa në linjën Shqipëri-Greqi-Vendet e BE-së, Shqipëri- Greqi-Turqi dhe Shqipëri- Maqedoni-Bullgari- Turqi.

Në Shqipëri ndër të tjera janë identifikuar nëngrupe personash të cilët në kuadrin e një grupi të strukturuar kriminal kanë një bashkëpunim konstant me njeti tjetrin në kryerjen e kësaj veprimtarie kriminale.

?Shtetasit Met Kanani, Bilbil Heqimi, Arvanit Ulndrej etj, dyshohen se janë organizatorët e kësaj veprimtarie kriminale duke siguruar linjat e trafikimit. Ata në bashkëpunim edhe me persona të tjerë, brenda dhe jashtë vendit, ndihmohen edhe nga persona të tjerë ende të paidentifikuar saktësisht në kryerjen e kësaj veprimtarie kriminale me pasoja shoqërore mjaft të rrezikshme?, thuhet në dosjen e Prokurorisë.

Prokuroria e Krimeve të Rënda, në kuadër të veprimeve hetimore ka shkëmbyer informacione me autoritetet policore të Greqisë, Turqisë, Maqedonisë dhe Italisë me ndërmjetësimin e DEA-s.

Me datë 02.03.2017, me anë të shkresës 2159 Prot/A.M, nga ana e autoriteteve shqiptare i është dërguar informacion Zyrës Ndërlidhëse të Policise Italiane “Interforza”, mbi dyshimet për kryerjen e aktivitetit kriminal të tratikimit dhe shpërndarjes së lëndëve narkotike në territorin italian.

Po në të njëjtë datë 02.03.2017, me shkrese 2160 Prot/A.M. nga ana e autoriteteve shqiptare i është dërguar informacion oficerit të kontaktit policor pranë Ambasadës së Republikës Federale të Gjermanisë mbi dyshimet për kryerjen e aktivitetit kriminal të trafikimit dhe shpërndarjes së lendeve narkotike në territorin gjerman./CNA.al

-Vijon-