E fundit!

20:52 Aktualitet

FOTOLAJM/ 47 ditë proteste, qytetarët me pankarta "pikante"

Mijëra qytetarë janë grumbulluar edhe këtë të enjte për pr...

Zbardhen statistikat e Vettingut/ Çdo muaj denoncohen 145 gjyqtarë dhe prokurorë

5 Maj 2018, 08:25, Aktualitet CNA

Procesi i vetingut ka rritur besimin e qytetarëve se reforma në drejtësi do pastrojë gjyqësorin nga të korruptuarit. Deri më tani janë dhënë rezultate për 6 gjyqtarët dhe prokurorët e parë, ku vetëm 2 kanë dalë të pastër.

Por një rol të rëndësishëm në zbulimin e aferave të tyre kanë pasur dhe vetë qytetarët. Në faqen zyrtare KPK ka publikuar një formular, ku çdo person mund të denoncojë njerëz të drejtësisë nëse ka informacione për përfshirje të tyre në afera apo lidhje me botën e krimit.

Gazeta ka siguruar të dhënat për 6 mujorin e parë të funksionimit të Komisionit të Pavarur të Kualifikimit, sa i takon denoncimit të qytetarëve dhe shifrat janë befasuese.

Që prej muajit tetor 2017 e deri në mars të 2018 ka pasur plot 871 denoncime. Sa i takon prillit vijon procesimi i të dhënave, por sipas burimeve bashkë me to, në total bëhen rreth 1000 denoncime ndaj gjyqtarëve dhe prokurorëve.

Nëse analizojmë të dhënat sipas muajve, numri më i ulët ka qenë gjatë tetorit 2017, pasi ka pasur vetëm 2 denoncime. Në nëntor kjo shifër ka arritur në 112 raste, ndërsa rekordi është në muajin dhjetor, pasi janë shënuar 321 denoncime. Gjatë vitit 2018 ritmi ka rënë disi. Në janar ka pasur 187 denoncime, në shkurt 134 dhe në mars 115, shkruan gazeta Sot.

Mesatarisht i bie që çdo muaj të denoncohen 145 gjyqtarë dhe prokurorë. Sipas informacioneve nga komisioni i Pavarur i Kualifikimit, denoncimet janë bërë për të gjitha shkallët e gjyqësorit. Shumica e denoncuesve kanë denoncuar vendimet që kanë marrë gjyqtarët që nga Kushtetuesja, te Gjykata e Lartë, por dhe te prokuroritë dhe gjykatat e shkallëve të para apo të Apelit. Ata pretendojnë se personat me të cilët kanë qenë në gjyq kanë dhënë para dhe kanë korruptuar gjykatësit.

Po ashtu ka denoncime dhe ndaj prokurorëve që kanë kërkuar para në këmbim të ndryshimit të masave të sigurisë apo për mbylljen e hetimeve. Por sipas informacioneve nga KPK, shumica nuk kanë dorëzuar prova si filmime, foto, apo regjistrime për të vërtetuar pretendimet, por kanë dorëzuar vetëm vendimet.

Megjithatë ka dhe raste kur denoncimet kanë zbuluar afera të gjyqtarëve dhe prokurorëve. Madje dhe për emrat që tashmë kanë ngelur në veting, kanë qenë qytetarët që kanë denoncuar mjaft raste abuzive.