Lista Serbe ha në të dy krahët/ Është në opozitë dhe në qeveri

23 Prill 2018, 16:54, Aktualitet CNA

Pavarësisht që Lista Serbe ka deklaruar se ka braktisur koalicionin qeverisës, largimi i përfaqësuesve të këtij subjekti politik nga Qeveria e Kosovës nuk është final, kanë deklaruar zyrtarët e kabinetit të kryeministrit të Kosovës, Ramush Haradinaj.

Zëdhënësja e Qeverisë së Kosovës, Donjeta Gashi thotë për radion “Evropa e Lirë” se kryeministri Haradinaj, në vazhdimësi është duke kontaktuar me përfaqësuesit e Lista Serbe dhe i ka ftuar ata që të kthehen në Qeveri.

?Qeveria e Republikës së Kosovës është duke vazhduar diskutimin apo komunikimin me përfaqësuesit e Listës Serbe në Qeveri. Deri më tash nuk ka ende asgjë zyrtare sa i përket largimit përfundimtar të tyre. Kryeministri Haradinaj u ka bërë thirrje që ata të kthehen në detyrat që i kanë si ministra dhe në postet tjera qeverisëse. Në ndërkohë, puna në këto ministri po vazhdon me bartësit e tjerë. Do të thotë, nuk ka asgjë definitive dhe finale për sa i përket largimit të Listës Serbe dhe në anën tjetër, kryeministri dhe Qeveria po vazhdojnë të kenë konsulta dhe komunikime me ta, për rikthim në detyra?, tha Gashi.

Në anën tjetër, përfaqësuesit e Lista Serbe nuk kanë dashur që të komentojnë nëse janë duke biseduar me Qeverinë e Kosovës për rikthim në detyra, e as për faktin që ministra të caktuar nga radhët e Lista Serbe, janë duke vazhduar punën e tyre edhe pas deklaratës zyrtare të këtij subjekti se e kanë braktisur koalicionin qeverisës.

Deputeti i Listës… , Igor Simiç, ditë më parë i ka thënë radios “Evropa e Lirë” se deputetët e Listës vazhdojnë të punojnë nga tabori opozitar, kurse ministrat janë ?vetëm në kapacitetet teknike?.

Artan Murati, analist nga Instituti Demokratik i Kosovës, duke folur për radion “Evropa e Lirë” vlerëson se Lista Serbe është duke bërë sjellje joparimore politike.

Siç thotë ai, deputetët e këtij subjekti politik në Kuvendin e Kosovës, tashmë janë ulur në ulëset e opozitës, ndërkohë që ministrat nga ky subjekt politik, sipas tij, nuk kanë dhënë dorëheqje nga Qeveria dhe vazhdojnë të jenë pjesë e saj.

Ai ka shtuar se Lista Serbe edhe më herët ka bojkotuar punën në ekzekutiv dhe Kuvend në mënyrë që ta shfrytëzojë politikisht situatën. Një gjë e tillë, sipas Muratit, po ndodhë sërish.

Sidoqoftë, Lista Serbe ka tre ministra, njëri prej tyre edhe në postin e zëvendëskryeministrit, si dhe disa poste të zëvendësministrave. Në Kuvendin e Kosovës ajo ka 10 deputetë… /REL-Shkrimi vjen i redaktuar nga CNA.al/