Ngërçi në Kushtetuese/ Hapen dosjet e anëtarëve të Këshillit të Emërimeve në Drejtësi

3 Prill 2018, 07:47, Aktualitet CNA

Ngërçi i krijuar në Gjykatën Kushtetuese ka futur në ?lojë? edhe misionet ndërkombëtare të OPDAT dhe EURALIUS.

Kushtetuesja është futur në një kolaps që pas përjashtimit nga sistemi i drejtësisë të ish-anëtarit të saj, Fatos Lulo për shkak të vetingut sepse tashmë nuk plotëson dot numrin e nevojshëm të gjyqtarëve për të krijuar kuorumin.

Këshilli i Emërimeve në Drejtësi është institucioni përgjegjës për të bërë emërime të reja në Gjykatën Kushtetuese, por problemi qëndron në faktin se vetë anëtarët e KED nuk e kanë kaluar vetingun.

Për ta nuk kanë dalë akoma rezultatet e procesit të rivlerësimit dhe në këto kushte procedura e përzgjedhjes së anëtarëve të rinj mund të quhet e pavlefshme.

Anëtarët e KED ndodhen në dilemë nëse duhet të marrin një vendim për aplikuesit, duke kryer një renditje ku 3 më të mirët qëndrojnë në krye, në një kohë kur as ata vetë s?e kanë kaluar procesin e vetingut.

Gazeta Sot ka mësuar se për këtë arsye anëtarët e KED kanë kërkuar një mendim nga OPDAT dhe EURALIUS sesi duhet të veprojnë në këtë rast. Pra, përfaqësues të këtyre dy misioneve ndërkombëtare do të asistojnë në zgjidhjen e ngërçit në Kushtetuese, duke i treguar KED se çfarë vendimi duhet të merret: të vijojë puna, pavarësisht vetingut apo të presë derisa të dalin rezultatet.

Për të ndihmuar në zgjidhjen e kësaj situate të krijuar në Gjykatën Kushtetuese ?rol? do të marrë edhe Komisioni i Pavarur i Kualifikimit. Mësohet se KPK do të shohë me përparësi dosjet e anëtarëve të Këshillit të Emërimeve në Drejtësi, në mënyrë që të dalin sa më parë rezultatet e vetingut për ta dhe më pas të mos ketë më debat për ligjshmërinë e vendimmarrjes së tyre.

Sipas informacioneve, pasi të përfundohen të gjitha procedurat për gjyqtaren Vitore Tusha, për të cilën do të zhvillohet seanca dëgjimore në datën 4 prill, komisioni i vetingut do të merret me dosjet e anëtarëve të KED. Burime pranë KPK i thanë gazetës se është ky institucion është i interesuar të kryejë të gjitha procedurat e rivlerësimit për çdo subjekt me efikasitet dhe saktësi të plotë, por theksuan se tashmë do të punohet me prioritet mbi dosjet e subjekteve të Këshillit të Emërimeve në Drejtësi.