Kur ligjvënësi Alibeaj ja fut kot për ligjin

24 Mars 2018, 11:06, Aktualitet CNA

Të enjten tek Ylli Rakipi në emisionin ?Të paekspozuarit? në Top Channel, një panel me gazetarë dhe politikanë folen për abuzimet me tokat duke filluar me skandalin e fundit që kishte ndodhur tek ?Rana e Hedhun? në Shëngjin. Abuzim për të cilin u arrestua edhe kryebashkiaku Fran Frrokaj.

Por, ajo që bie më shumë në sy është fakti sesi një ligjvënës dhe një jurist me eksperiencë si Enkelejd Alibeaj tregonte fatkeqësisht paditurinë e tij juridike dhe më pas shfaqje urrejtje ndaj biznesit, apo ekzaktësisht investitorëve strategjikë në vend. Alibeaj sulmoi ligjin për investimet strategjike dhe pikërisht këtu fillon gafa e parë e tij.

Së pari, ligji për Investimet Strategjike nuk është produkt i Edi Ramës dhe qeverisë së tij, ai vetëm është ndryshuar. Ligji ka ekzistuar edhe më parë, vetëm se ka pasur mesa duket si gjithmonë vështirësi dhe pamundësi në zbatim korrekt.

Ligji i mëparshëm për investimet strategjike ka qënë një përpjekje pozitive për të ftuar dhe përthithur investitorët.

Ka qënë vetë qeveria e Partisë Demokratike dhe ish-kryeministrit Sali Berisha që më vonë edhe në aleancë me LSI-në i kanë dhënë një shtysë këtij ligji, i cili gjithsesi nuk funksionon.

Alibeaj bën rolin e të paditurit, por një ligjvënës dhe përfaqësues politik i PD nuk mund të flasë broçkulla për inate apo nga padituria për opinionin publik.

Mjafton që ky jurist të lexojë ligjin e ri, i cili ka vetëm një ndryshim nga ai i mëparshmi dhe është fakti se përkufizimin e investitorit strategjik nuk e kufizon vetëm për të huajt.

Ligji i ri e heq këtë lloj diskriminimi për investitorët potencial vendas, duke i vënë të barabartë edhe ata në garë për të fituar këtë lloj statusi.

Pse është keq ligji për Alibeajn kur ligji është bërë nga PD-ja dhe socialistët thjeshtë i kanë dhënë mundësinë investitorëve vendas?

Ligji i ri dhe ndryshimet e tij tregojnë qartazi se sheshohet pabarazia e mundësive që ekzistonin vetëm për investitorët e huaj. Tashmë mund të përfitojnë edhe investitorët vendas, dhe si i tillë ky është një akt që duhet përshëndetur, sidomos nga një parti si ajo e PD që ka lindur si forcë kapitaliste, jo si partia e proletariatit.

Qëndrimi i Alibeajt nuk bën shumë çudi në fakt, në çmenduritë e përditshme që dëgjojmë të dalin nga goja e klasës tonë politike. Por, kur një artikulim publik e bën një jurist me eksperiencë është momenti për të kuptuar se ku ka katandisur politika jonë dhe kujt i shërben ajo./ CNA.al