Ekskluzive- Skandali TOP SECRET/ Fshihen 200 dosje VIP nga serveri i hipotekës

27 Janar 2018, 11:25, Aktualitet CNA

Një akt kriminal dhe një skandal i padëgjuar këto 27 vite ka ndodhur në zyrën qendrore të regjistrimit të pasurive.

CNA (City News Albania) ka mësuar se Ministria e Drejtësisë po përpiqet të fshehë një krim që ka ndodhur në ZQRRP (Zyrën Qëndrore të Rregjistrimit të Pasurive).

Është shkatërruar sistemi dhe janë fshirë nga server të paktën 200 dosje VIP, të cilat janë pasuritë e gjyqtarëve, prokurorëve dhe politikanëve. Fshirja e tyre është bërë për të penguar hetimet nga Prokuroria dhe SPAK, për pasuritë e tyre qindra milionë dollarë.

Një burim zyrtar tha ekskluzivisht për CNA (City News Albania) se prej disa kohësh në hipoteka kishte filluar investimi për ndërtimin e një sistemi (data bazë) për të pasur online dhe në mënyrë elektronike pasuritë e shqiptarëve sipas zonave kadastarle, sistem ky i cili do të siguronte një mënyrë më të lehtë për gjetjen dhe përpunimin e të dhënave të këtyre pasurive.

Por si shumë vepra të tjera kriminale në hipotekë ka ndodhur që sistemi të shkatërrohet dhe të paktën 200 dosje VIP janë zhdukur. Ato mund të gjenden ndoshta fizikisht, por qindra milionët e taksapaguesve shqiptarë dhe gjithçka ishte investuar në këtë sistem tashmë është shkatërruar.

Ministria e Drejtësisë është vënë në dijeni në muajin shtator dhe më pas në nëntor ministrja e re, Etilda Gjonaj, ka çuar një grup kontrolli në Drejtorinë e Përgjithshme të hipotekave.

Gjithçka po përpiqet të mbahet Top Secret dhe po përpiqet të mbahet i fshehtë. Skandali më i madh që ka ndodhur në hipotekë në 27 vitet e fundit.

Një tjetër burim informoi CNA (City News Albania) se shkatërrimi i sistemit është bërë me qëllimin për të vështirësuar punën e organeve ligj-zbatuese të cilat do të fillojnë pas disa javësh investigimin e pasurive të gjyqtarëve, prokurorëve dhe politikanëve.

Shkatërrimi i sistemit është justifikuar me dëmtimin e serverit që po përpiqet të ndërrohet, por të gjitha të dhënat kryesore janë fshirë.

Ky akt duket të jetë i qëllimshëm dhe një veprim mafioz që kërkon të përgatisë një terren të vështirë për SPAK dhe të fshehë pasuritë e krijuara nga korrupsioni për disa qindra njerëz të strukturave të drejtësisë dhe politikës.

CNA (City News Albania) ka zhvilluar një investigim të plotë në lidhje me të gjitha veprimet mafioze dhe aktet kriminale, korrupsionin dhe veprimet banditeske të ndodhura në hipoteka të cilat prej disa kohësh po përpiqen të mbahen të fshehta nga zyrtarët e qeverisë.

Fshirja e të paktën 200 dosjeve Vip, të dhënave nga sistemi dhe shkatërrimi i serverit pritet ti çohen Prokurorisë për të filluar një tjetër hetim dhe gjetjen e përgjegjësve. Përtej akuzës për korrupsion ka dyshime se shkatërrimi është bërë me qëllimin për të zhdukur çdo gjurmë të një investimi disa miliona dollarësh. /CNA.al