Zgjedhja e Arta Markut përplas Luan Ramën me Monika Kryemadhin

22 Dhjetor 2017, 15:34, Aktualitet CNA

Nënkryetari i Lëvizjes Socialiste për Integrim, Luan Rama, ka reaguar në lidhje me deklaratat e bëra nga Monika Kryemadhi, pas zgjedhjes së Arta Markut në postin e Prokurorit të Përgjithshëm të Përkohshëm.

Ai ka kundërshtuar Kryemadhin, pas deklaratës se LSI nuk është kundër Arta Markut, por kundër praktikës antikushtetuese dhe antiligjore që u ndiq nga ana e Partisë Socialiste, teksa e sqaron më tej qëndrimin e tij.

Ai thotë: “Nuk jam dakord me ju zonja Kryemadhi!

Që prej votimit antikushtetues në Kuvendin e Shqipërisë, kur zonja Arta Marku u caktua si prokurore zëvendësuese e Prokurorit të Përgjithshëm e në vijim, ju kam dëgjuar në të gjitha prononcimet tuaja publike të shpreheni se ?nuk jemi kundër Artës e nuk kemi gjë me të, por me praktikën antikushtetuese dhe antiligjore që u ndoq nga ana e Partisë Socialiste?.

Më lejoni zonja Kryemadhi t?ju shpreh objeksionet e mia, përkatësisht edhe kundërshtimin tim ndaj këtij qëndrimi të shprehur nga ana juaj, pasi zonja Arta Marku, me apo pa vetëdije, u bë pjesë e lojës politike të Partisë Socialiste për të deformuar e penguar reformën në drejtësi dhe pranoi të zëvendësojë Prokurorin e Përgjithshëm, e mbështetur vetëm nga votat e urdhëruara të Kryeministrit dhe klanit të tij!”

Sipas tij një jurist profesionist, nuk do të pranonte një detyrë të caktuar në kundërshtim me Kushtetutën dhe përmes një procesi krize dhe konflikti politik.

“Një prokuror me integritet qytetar dhe profesional, një profesionist që karrierën e bazon në zotësitë profesionale dhe jo në konjukturat politike, një jurist që i falet vetëm ligjit dhe jo urdhërit politik, nuk do të pranonte të caktohej në një detyrë në kundërshtim me Kushtetutën dhe përmes një një procesi krize dhe konflikti politik!”, – shkruan Rama në rrjetet sociale.

Në përfundim ai shprehet se, “Procesi antikushtetues dhe antiligjor i kapjes politike të Prokurorit të Përgjithshëm nuk është as virtual dhe as imagjinar. Ai ka autorë realë, ka protagonistë, ka aktorë, ka njerëz përgjegjës, dhe Arta Marku është një ndër ta!” /CityNews