Bankat bllokojnë kreditë për shtetasit e huaj/ Miliona euro jashtë ekonomisë shqiptare

11 Dhjetor 2017, 11:39, Aktualitet CNA

Bankat e nivelit të dytë në Shqipëri nuk kreditojnë shtetasit e huaj, të cilët duan të blenë pasuri të paluajtshme, si vila apo apartamente në Shqipëri.

Ligji shqiptar e ndalon që të huajt të blejnë troje në vendin tonë, por nuk jemi tek ky rast, por tek ambjentet e banimit.

Pra, nëse një i huaj kërkon të blejë një apartament me kredi në Vlorë, Sarandë apo në pikat turistike malore, nuk mund të aplikojë dhe më pas të sigurojë financim nga bankat e nivelit të dytë në Shqipëri.

Ky duket të jetë një handikap i madh dhe frenon miliona euro investime në tregun e pasurive të paluajtshme, të cilat mund të vijnë si formë kredie nga shtetas të huaj.

Duke sjellë një shembull konkret i kontaktuar nga stafi i Citynews.al, një shtetas i huaj që punon dhe jeton në Shqipëri, i cili mban pozicionin drejtor në një kompani investimesh apo tregëtie, pasi e njeh Shqipërinë kërkon të blejë një aparament duke u kredituar, por këtë e ka të pamundur.

Bankat e nivelit të dytë nuk japin kredi për shtetasit e huaj që jetojnë në Shqipëri. Ata mund të blejnë prona, (shtëpi banimi, vila) vetëm duke paguar 100% të shumës. Ne jetojmë në kohën e investimeve, miliarda me kreditim, bankat shqiptare nuk kreditojnë personat më të mirë paguar në vendin tonë, por ndoshta dhe pa qëllim janë pengesë për thithjen e miliona eurove që do të qarkullonin në tregun e Real Estate.

Një tjetër rast i kontaktuar nga redaksia e Citynews.al, sjell një tjetër panoramë të kësaj problematike. Pasi ka vizituar për të disatën herë Shqipërinë, ai vendos që të blejë një ambient (sqarojmë gjjithmonë ambjent banimi në zonë turistike si Saranda), dhe për këtë blerje mendon si në vendin e tij që investimin ta kryente nëpërmjet një financimi bankar.

I punësuar një në kompani prestigjoze juridike, me të ardhura të provuara zyrtarisht të qëndrueshme dhe të konsiderueshme prej gati 15 vitesh, shkon të aplikojë në një bankë të nivelit të dytë. Përgjigja është shokuese, banka nuk pranon as aplikim, pra as ta dëgjojë e jo më të vlerësojë kërkesën e shtetasit të huaj që kërkon të investojë në Shqipëri për të blerë një aset në zonë turistike.

Megjithëse banka e kishte mjaft të lehtë të kryente verifikimet e saj tek simotra jashtë Shqipërisë, nuk ka denjuar të kryejë asnjë veprim.

Banka e Shqipërisë dhe ligji nuk e ndalojnë aspak mundësinë e përfshirjes në skemat e kreditimit edhe të shtetasve të huaj ashtu si shtetasve shqiptarë.

Qeveria flet dhe trumbeton turizmin, për më tepër atë elitar, ndërkohë bankat e nivelit të dytë me sjellje arkaike, pengojnë atë që në realitet mund të ishte një burim i lartë të ardhurash të sigurta për investitorët dhe ekonominë e vendit.

Banka e Shqipërisë dhe Ministria e Financave dhe Ekonomisë, nuk mund të qëndrojnë të heshtura dhe pa reagim përballë një situate, kur kërkohet më shumë mbështetje dhe zhvillim për turizmin. Bankat e nivelit të dytë nuk mund të dalin mbi shtetin duke frenuar miliona euro investime të sigurta për turizmin dhe ekonominë e Shqipërisë./CityNews