E fundit!

11:46 Aktualitet

Balla, pyetje publike protestuesve

Kreu i Grupit Parlamentar të PS-së, Taulant Balla, u është...

KShH përgënjeshtron ministren/ Ja si trajtohen vërtetë të dënuarit në burgun e Krujës

2 Dhjetor 2017, 16:34, Aktualitet CNA

Më datë 17 nëntor të këtij viti Komiteti Shqiptar i Helsinkit (KShH), ka monitoruar nga afër situatën e respektimit të të drejtave dhe trajtimin e shtetasve që mbahen në Institucionin e Ekzekutimit të Vendimeve Penale (IEVP) në Krujë.

Nga informacionet u konstatua se në këtë institucion ndodheshin gjithsej 209 persona, prej të cilëve, 137 janë me vendim gjyqësor ?Mjekim i detyruar në një institucion mjekësor? ndërsa 9 prej tyre me masë sigurimi ?Shtrim i përkohshëm në një institucion psikiatrik?.

Nga takimet e zhvilluara në këtë institucion mësohet se janë paraqitur ankesa të shumta lidhur me furnizimin me ujë, ngrohjen, ushqimin dhe higjenën.

Ndërkohë që kujtojmë se ministrja e drejtësisë Etilda Gjonaj, ka vizituar paraditen e sotme këtë burg, duke thënë se situata është në stabilitet dhe se burgjet janë në nivel të lartë gatishmërie.

?Ka një bashkëpunim të ngushtë me stafin e emergjencës. Forcat e policisë në burgje janë në nivel të lartë gatishmërie?, tha ministrja.

Deklarata e plotë:

Gjatë verifikimit rezultoi gjithashtu se, në këtë burg, 60 persona ishin të moshës mbi 53 vjeç që vuanin nga sëmundje kronike, 8 paraplegjikë, 14 diabetikë, 17 me sëmundje kardiovaskulare, 6 me sëmundje pulmonare, 1 me sëmundje tumoriale ndërsa 8 persona me sëmundje infektive (HIV/AIDS, TBC, HEPATIT). Pavarësisht se, sipas organikës së miratuar të institucionit duhet të jenë 5 mjekë, efektivisht janë të punësuar vetëm 3 mjekë të përgjithshëm. Institucioni ka dy vakanca për pozicionin e mjekut psikiatër.

Numri i lartë i të sëmurëve me probleme të shëndetit mendor të akomoduar në këtë institución bën që të jetë i pamjaftueshëm dhe jo cilësor ofrimi i këtij shërbimi, një herë në javë dhe me orar të reduktuar nga mjekët psikiatër të ardhur nga Spitali i Burgut Tiranë (IVSHB) dhe IEVP Durrës. Nga takimet e zhvilluara në këtë institucion na u paraqitën ankesa të shumta lidhur me furnizimin me ujë, ngrohjen, ushqimin dhe higjenën.

Gjithashtu u vërejt një mungesë e aktiviteteve me natyrë ri-edukuese dhe rehabilituese. Është e nevojshme të përmendim se, në organikën e sektorit psikosocial kishte një vakancë ndërkohë që të punësuarit pranë këtij sektori nuk kishin të gjithë kualifikimin e nevojshëm si punonjës social apo psikolog. Kushtet infrastrukturore të institucionit janë tejet të amortizuara. Mungesa e personelit të kualifikuar mjekësor sidomos për të sëmurët me probleme të shëndetit mendor si dhe qëndrimi në ambiente të paparshtatshme dhe me lagështirë, përkeqësojnë gjendjen shëndetësore të të sëmurëve kronikë në këtë institución duke i vendosur ata në kushtet e trajtimit çnjerëzor dhe degradues.

Me këtë rast, KShH përshëndet vënien në funksionim të burgut në Shkodër që do të krijojë kushte të përshtatshme për personat e dënuar me vendim të formës së prerë të gjykatës, ku do të realizohet më mirë detyrimi ligjor për trajtimin e tyre dhe që do t?i shërbente në mënyrë më të efektshme, rehabilitimit dhe ri-edukimit, konform legjislacionit vendas dhe ndërkombëtar. KShH e shikon të nevojshme të theksojë se, trajtimi i personave me masë mjekësore ?Mjekim i detyruar në një institucion mjekësor? në sistemin e burgjeve dhe sidomos në burgun e Krujës është në kundërshtim të hapur me Kodin Penal dhe Ligjin nr. 44/2012, ?Për shëndetin mendor?.

Prandaj e shohim të nevojshme të parashtrojmë rekomandimin tonë të përsëritur se, transferimi i personave me masë mjekësore ?Mjekim i detyruar në një institucion mjekësor? dhe me masë sigurimi ?Shtrim i përkohshëm në një institucion psikiatrik? në institucione mjekësore të specializuara për shëndetin mendor që janë në varësi të Ministrisë së Shëndetësisë dhe Mbrojtjes Sociale është i domosdoshëm. /CityNews