Paralajmëron Ngjela/ FBI po heton mbi 30 qeveritarë

9 Nëntor 2017, 14:32, Aktualitet CNA

Në një postim në rrjetet sociale, avokati Spartak Ngjela ka komentuar situatën politike në vend.

Ngjela, në postimin e tij thekson se ardhja e hetuesve të FBI në Shqipëri ka bërë që politikanët e korruptuar të flasin përçart.

Gjithashtu, Ngjela ka deklaruar mes të tjerash se ka nisur hetimi intensiv i pasurive dhe fakteve që janë mbledhur nga aferat korruptive të mbi 30 qeveritarëve të rëndësishëm në dhjetë vjetët e fundit.

Postimi i plotë:

Erdhën hetuesit ndërkombëtarë.
Shihni si janë trembur krerët vjedhës të Shqipërisë.
Ka filluar hetimi intensiv i pasurive dhe fakteve që janë mbledhur nga aferat korruptive të mbi 30 qeveritarëve të rëndësishëm në dhjetë vjetët e fundit.
Po flasin përçart qeveritarët e korrupruar; kanë nxjerrë përkrahësit injorantë t’i kundërvihen ambasadorit amerikan; kurse kryeministri aktual kërkon të zbojë frikën nga vetja me brekushe otomane.
Prisni se do të shihni edhe budallallëqe të tjera .
Nuk do të shpëtojë asnjë nga ata që është i korruptuar.
Ambasadori i SHBA-së dhe BE-së duhet të vijojnë më ekspozimin e fakteve kundër korrupsionit dhe krimit në Shqipërinë e sotme.

I. Shqipëria ka qenë gjithmonë një vend i vjedhur nga krerët dhe një vend i shitur te fqinjët po prej tyre; por dhe një vend i shpëtuar nga rasti.

Të katër shtetet që kemi përreth janë ngritur mbi territore shqiptare dhe mbi genocidin për shfarosjen e shqiptarëve.
Këtu ka filluar historikisht vjedhja e shqiptarëve nga krerët e tyre dhe shitja e interesit kombëtar nga këta krerë.
Nuk bënë përjashtim as krerët që erdhën pas rrëzimit të komunizmit.
Ishte madje ambasadorja e BE, Vllahutin, që iu tha shqiptarëve dje se “këtu po shitet atdheu për të shpëtuar shtëpitë; dhe jo shtëpitë për të shpëtuar atdheun”.

Por koha e solli që këta të shtëpive të jenë të fundit; sigurisht që do të jenë dhe më të diskredituarit.
Procesi i tyre në paraqitjen e të vërtetës do të krijojë pa dyshim qëndrën ku do të mbështetet moraliteti për qeverisjet e ardhëshme.
Një qeverisje e pamoralshme, nëse diskredotohet më fakte, krijon historinë e re të moralitetit qeverisës.

II. Ky është momentumi parësor historik i kësaj kohe: USA dhe BE kanë marrë në dorë eliminimin e korrupsionit shtetëror dhe krimit të organizuar.
Pse pikërisht këta?

Historia e solli që Perëndimi dhe sidomos politika amerikane ta mbështesnin interesin e tyre te shqiptarët. Përveç Amerikës dhe Gjermanisë, në këtë histori mbi njëqind vjeçare, të gjithë të tjerët kanë qënë kundër shqiptarëve. Tani janë të gjithë pro, dhe me shqiptarët, përveç Rusisë dhe krerëve shqiptarë që drejtojnë dhe vjedhin shqiptarët.
Këta kanë qënë dhe po mbeten të turpshëm.
Po të gjithë do të hetohen e do të dorëzojnë pa përjashtim gjënë e vjedhur.
Koha historike e të drejtave të shqiptarëve të bashkuar ka ardhur./ CityNews