E fundit!

18:07 Aktualitet

Komisioni i Reformës Zgjedhore kërkon shtyrjen e afatit të punës

Komisioni i Posaçëm i Reformës Zgjedhore ka bërë kërkesë K...

Nga Mentor KIKIA/ Suksesi i prokurorisë nuk është vetëm futja e Tahirit në burg

24 Tetor 2017, 20:16, Aktualitet CNA

Sajmir Tahiri doli vetë para mediave të bëjë publik një dokument të prokurorisë së Katanias, që tregon se ai nuk është nën hetim nga ky organ. Pa u marrë ende në pyetje nga prokuroria, Tahiri ka nisur të bëjë kështu avokatin e vetes nga foltorja e Kuvendit të Shqipërisë. Kjo tregon qartë se hetimi i ish ministrit të brendshëm nuk do të jetë i lehtë, pasi Tahiri edhe pse i pezulluar nga grupi i PS, do të vazhdojë të flasë nga foltorja e Kuvendit. Padyshim që ky hetim do të vazhdojë të transformohet nga një çështje penale në një çështje, që do të prodhojë më shumë politikë dhe më pak drejtësi.

Vëmendja në fakt është përqëndruar tek Tahiri, si protagonist publik i kësaj çështjeje. Por historia as fillon dhe as mbaron me ish ministrin. Edhe pse, nëse akuzat vërtetohen, ai mund të jetë strumbullari i këtij biznesi kriminal, Tahiri është sërish maja e ajsbergut. Detyra e prokurorisë në këtë rast nuk duhet të jetë thjeshtë dhe vetëm futja në burg e Tahirit, por zbardhja e fijeve të mekanizmit që kishte bërë bashkë zyrtarë policie e trafikantë, kryesisht në Vlorë. Tashmë përgjimet italiane, në mos ngarkofshin me përgjegjësi penale Tahirin, ngarkojnë që çke me të ish zyrtarë të policisë lokale. Përgjimet, në mos tregofshin se Tahiri është ?shefi i madh?, tregojnë që çke me të se ?shefat e vegjel?, ishin atje në shërbim të trafikantëve të drogës. Edhe më herët, edhe pse pa përgjime, faktet tregojnë se bashkëpunimi i policisë me rrjetin kultivues-magazinues-transportues ishte i mirëorganizuar.

Sasitë e drogës që vazhdojnë të dalin nga magazinat tregojnë se sa pak është asgjësuar nga operacionet e policisë, kryesisht në Vlorë. Ajo që tashmë dihet, është se ndër kultivuesit, në burg përfunduan së paku një dyzinë fshatarësh, punëtorësh krahu dhe ata që kishin mbjellë disa dhjetra rrënjë. Por jo ?peshqit? e mëdhenj.

Asgjësimi i një parcele me lëndë narkotike është një vendngjarje kriminale që duhet hetuar nga prokuroia. Por është tashmë publik pretendimi i prokurorisë se oficerët e policisë gjyqësore nuk njoftoheshin për operacionet e asgjësimit dhe asnjëherë për to nuk është bërë një hetim, për të mësuar se kush ishte financuesi i mbjelljes së parcelave të mëdha. Për pasojë, nuk u shkua asnjëherë tek organizatorët e vërtetë. Por prokuroria nuk duhet vetëm të shfajësohet për atë që nuk ka bërë. Ajo kishte të gjithë të drejtën të hape një hetim edhe ndaj policisë atë kohë për operacionet, që sikudër pretendon, i ka mësuar nga media. Por nuk e ka bërë. Për këtë arsye edhe vullkani shpërtheu vetëm pasi u arrestua Moisi Habilaj në Itali, i cili përgjohej kudo ku vinte këmbën.

Padyshim që PD e PS do të vazhdojnë të bëjnë politikë me Tahirin. Por prokuroria duhet të zbardhë dhe shkulë policët e inkriminuar nga trupi i policisë së shtetit. Dhe, nëse bën këtë, Tahiri edhe sikur të mos preket penalisht askund, e ka marrë gjysmën e dënimit./Opinion.al