Basha: Të arrestohet Saimir Tahiri/ Rama të largohet nga qeveria

19 Tetor 2017, 11:41, Aktualitet CNA

Në një dalje për mediat, kreu demokrat Lulzim Basha ka kërkuar një mbledhje urgjente të Këshillit të Mandateve, për heqjen e imunitetit të Saimir Tahirit dhe arrestimin e tij.

Gjithashtu Basha ka kërkuar edhe largimin e Edi Ramës nga qeveria, i cili sipas tij është përgjegjës për situatën e krijuar.

Sipas Lulzim Bashës, Partia Socialiste me në krye Edi Ramën është në buzë të greminës.

?Është koha që çdo shqiptarë dhe çdo deputet i Kuvendit të Shqipërisë të veprojë në përputhje me ligjin. Arrestimi i Saimir Tahirit është hapi i parë që duhet ndërmarrë?- tha Basha.

Gjithashtu Basha tha se ?Që në këtë moment qeverisja e Edi Ramës ka mbaruar dhe çdo ditë e tij si kryeministër është agoni. Ai është i vdekur politikisht, një kufomë politike që sillet vërdallë?.

Kreu demokrat tha se zgjidhja e vetme është arrestimi i Saimir Tahirit dhe largimi i menjëhershëm i Ramës nga posti që ai mban./ CityNews

Deklaratë e Kryetarit të Partisë Demokratike, Lulzim Basha

Prokuroria e Krimeve të Rënda sapo ka njoftuar depozitimin në Kuvendin e Shqipërisë të kërkesës për heqjen e imunitetit, arrestimin dhe kontrollin e banesës të deputetit Saimir Tahiri.

I bëj thirrje Kuvendit të veprojë menjëherë.

I bëj thirrje Kuvendit të mbledhë menjëherë Komisionin e Mandateve dhe seancën plenare për të vepruar pa vonesë.

Çdo minutë, çdo orë vonesë do të shërbejë për shkatërrimin e provave.

Sot është koha që çdo shqiptar i ndershëm, çdo deputet në Kuvendin e Shqipërisë që ndihet përgjegjës para tyre, të veprojë në përputhje me ligjin dhe Kushtetutën. Arrestimi i Saimir Tahirit është vetëm hapi i parë. Në fakt, që prej këtij momenti, qeverisja e Edi Ramës ka mbaruar de fakto.

Çdo ditë e qendrimit të tij si kryeministër është agoni për të gjithë Shqipërinë. Vetë Edi Rama është sot i vdekur politikisht, një kufomë politike që sillet vërdallë dhe flet si njeri i ç?ekulibruar.

Partia Socialiste është sot në buzë të greminës nëse nuk shkëputet nga Edi Rama dhe grupi kriminal që ai solli në krye të Partisë Socialiste. Thirrja ime është për mbledhjen e menjëhershme të Komisionit të Mandateve, dhe të seancës plenare, për të votuar heqjen e imunitetit, që do ti hapë rrugë arrestimit të menjëhershëm të Saimir Tahirit. Thirrja ime është për largimin e menjëhershëm të Edi Ramës nga posti i kryeministrit. Koha nuk pret.