EDITORIAL/ Policia e Shtetit ha pas krahëve Interpolin

28 Shtator 2017, 16:26, Aktualitet CNA

Një shtetas shqiptar i dënuar më dhjetë vite burg nga Gjykata e Apelit të Bolonjës, në shkurt të vitit 2013, nuk i është bindur verdiktit të drejtësisë italiane por ka zgjedhur të arratiset drejt vendit të tij të origjinës, pra Shqipërisë.

Në këto kushte Interpol italia e ka shpallur atë në kërkim ndërkombëtar dhe duke qenë se edhe Shqipëria është pjesë anëtarësore e kësaj njësie ndërkombëtare policore, shkresa e shpalljes së tij ?person i kërkuar? ka mbritur edhe në zyrën përkatëse të Policisë shqiptare. Ku ka ndodhur që në vend të arrestimit dhe dorëzimit tek autoritetet italiane, shtetasi me identitet të dubluar, Dritan dhe Artan Xhindoli, i dënuar me dhjetë vite burg për vjedhje dhe falsifikim, të punësohet në Drejtorinë e Përgjithshme të Policisë së Shtetit si specialist në Departamentin e Krimit të Organizuar.

Ky ka qenë veç fillimi pasi në katër vitet vijuese ky i kërkuar nga Interpoli, në 2013-tën, falë fshehjes dhe mosdeklarimit të urdhërkërkimit ndërkombëtarë, ka arritur të ngjisë shkallët e karrierës në Policinë e Shtetit shqiptar duke arritur të marrë gradën e lartë ?Komisar?, dhe duke i kërkuar katër muaj më parë Gjykatës Administrative gradën superiore ?Kryekomisar?. Si prova vërtetuese ai ka paraqitur karrierën dhe vjetërsinë e punës në Policinë e Shtetit.

Nga i dënuar me dhjetë vite burg, prej Gjykatës italiane të Bolonjës, e i kërkuar prej Interpolit, në ngjitës i shkallëve të një karriere brilante në Policinë e Shtetit shqiptar!? E çuditëshme por një realitet i rrjedhur vetëm nga një veprim antiligjor i bërë prej punonjësve të Policisë që mbulojnë zyrën e depozitimit të kërkesave të Interpolit.

Një realitet i hidhur që tregon se fshehja dhe mosraportimi i urdhër-arresteve ka qenë një praktik fare e zakontë për administratën respektive që si pa gjë të keqe ja ka dalë të fsheh e të mos raportojë praninë e qënies i kërkuar ndërkombëtarisht të zyrtarit të lartë të Policisë së Shtetit, të dënuar me dhjetë vite burg.

A është ky rasti i vetëm apo ka edhe të tjerë punonjës policie me të tillë precedentë? A do ta hetojë Prokuroria edhe këtë pjesë të karrierës së Dritan Xhindolit për të zbuluar kush ka qenë zyrtari që ja zgjati jetën në liri Komisarit të Policisë i cili, nga “Komisar” për pak sa nuk u gradua ?Kryekomisar?? /CityNews