E fundit!

12:08 Aktualitet

Protestat/ Rama: Askush nuk mund ta ndalë rrugën e Shqipërisë drejt BE-së

Kryeministri Edi Rama në një intervistë të dhënë për gazet...

Plani i madh i Presidentit francez për Europën e të ardhmes

27 Shtator 2017, 16:55, Aktualitet CNA

I ndodhur sot në Universitetin e Sorbonës presidenti francez Emmanuel Macron ka shpalosur idetë e veta rreth të ardhmes së Bashkimit Europian, duke theksuar forcimin saj nga brenda e duke i dhenë një orientim të ri strategjik asaj në botën e globalizuar.

Lidhur me idetë e shpalosur në fjalimin e Macron ?Dojçe Welle ka komentuar se me interes u prit kryesisht programatika franceze në çështjet e financave dhe të ekonomisë si dhe ajo e zhvillimit të mëtejshëm të BE-së.

Pavarësisht rezervave edhe nga Berlini, Macron po çon përpara planin e tij për një “revolucion buxhetor”. Ai theksoi në Paris, se në reformat e nevojshme ai nuk ka “asnjë vijë të kuqe”, por vetëm “horizonte”.

Pavarësisht kritikave nga partia liberal-demokrate FDP dhe unioni konservator CDU, kreu i shtetit në Francë theksoi kërkesën e tij për një buxhet të mëvetsishëm për vendet me monedhën e përbashkët europiane si dhe një ministër Financash për këtë zonë. Por nuk duhet që nga kjo arkë e përbashkët e BE-së të përgjithësohen borxhet e vjetra apo problemet financiare të vendeve të veçanta, nxitoi të nënvizojë Macron.

Duhet menduar, që ky buxhet i përbashkët të financohet me një taksë. Ai përmendi si opsion për këtë taksën e ndërmarrjeve, që në Europë duhet të unifikohet në një normë minimale.

“Ne kemi nevojë për një buxhet të fortë në zemër të Europës, në zemër të Eurozonës”, apeloi politikani liberal i majtë.

Macron bëri thirrje gjithashtu për një etapë të re për një taksë të transaksioneve financiare për të gjitha vendet e BE-së. Të ardhurat prej kësaj takse mund të përdoren p.sh. për zhvillimin.

Ndër kërkesat qendrore të Macronit bën pjesë edhe forcimi i përpjekjeve të përbashkëta në BE për mbrojtjen dhe armatimet. Krahas një buxheti ushtarak në nivel europian ai bëri thirrje edhe për një “trupë të përbashkët të ndërhyrjes” dhe “një doktrinë të përbashkët” në sektorin e mbrojtjes.

Në luftën kundër terrorizmit, Macron var shpresa të mëdha tek një “prokurori speciale europiane”. Macron kërkon gjithashtu një akademi të shërbimeve sekrete për BE-në. Po ashtu ai preferon edhe një “autoritet europian për azilin”, në mënyrë që kërkesat e refugjatëve të mund të shqyrtohen më shpejt. Edhe një polici kufitare europiane është e nevojshme sipas tij.

Në qarqet qeveritare të Parisit momenti i zgjedhur nga Macron për këto deklarata është i favorshëm. Nuk duhet pritur, derisa në Berlin të kenë përfunduar bisedimet e koalicionit, se pastaj bëhet vonë për ta influencuar një debat mbi Europën, komenton Dojçe Welle.