Më jep 7 mijë euro ose publikoj fotot intime / Si e kërcënoi lezhjani 17-vjeçaren

19 Shtator 2017, 16:24, Aktualitet CNA

Një tjetër rast kërcënimi përmes rrjeteve sociale është shënuar në Lezhë ku një 18-vjeçar është vënë në pranga pasi kishte kërcënuar një vajzë 17-vjeçare që e kishte njohur 1 vit më parë.

Kristjan N kishte njohur vajzën dhe përmes rrjeteve sociale kishte vijuar komunikimin.

Edhe pse e lindur në Itali, ajo kishte shprehur simpati për Kristjanin, të cilin e takonte gjatë kohës që qëndronte në Lezhë për pushime.

Ndërkohë që gjatë gjithë kohës dy të rinjtë ishin në kontakt të vazhdueshëm përmes rrjeteve sociale. Pikërisht disa foto intime të tyre u bënë shkak për nisjen e kërcënimeve nga ana e të riut.

Ky i fundit gjatë javëve të fundit ka kanosur të dashurën e tij se do t?ia publikonte në rrjetet sociale fotot private nëse nuk i jepte një shumë prej 7 mijë eurosh. Shuma e parave i është kërkuar vajzës gjatë bisedave mes tyre, por edhe përmes mesazheve telefonike që ata kanë shkëmbyer kohët e fundit.

17-vjeçarja, e cila aktualisht ndodhet në Shqipëri, ka denoncuar ngjarjen në polici para pak kohësh, duke bërë që të nisin edhe hetimet në lidhje me kanosjen që i ishte bërë nga i dashuri. Gjatë kallëzimit, vajza ka rrëfyer para oficerëve të policisë të gjithë atë çfarë kishte ndodhur. Për këtë arsye, Seksioni kundër Krimeve në Drejtorinë Vendore të Policisë Lezhë mbajti nën mbikëqyrje 18-vjeçarin për një javë për të arritur në arrestimin e tij në flagrance, shkruan Panorama.

Forcat e policisë madje i kishin kërkuar vajzës që të mos ndërpriste komunikimin me të dashurin, në mënyrë që të kishte prova për pretendimet e saj. Sipas burimeve nga policia, bëhet e ditur se Kristjan N. ka vijuar shantazhet ndaj të dashurës së tij 17- vjeçare, sidomos në tri ditët e fundit, duke përdorur për këtë qëllim edhe mesazhet telefonike.

Ka qenë pikërisht kjo provë që ka çuar më pas në arrestimin nga forcat e policisë të 18-vjeçarit. Në dëshminë e tij para oficerëve të policisë, ai nuk e ka pranuar akuzën, duke deklaruar se mesazhet nuk janë nisur nga telefoni i tij. Policia po vijon hetimet në lidhje me ngjarjen, ndërsa ka sekuestruar telefonat celularë të dy të rinjve për të vërtetuar pretendimet e adoleshentes.

Sipas të dhënave, 17-vjeçarja, identiteti i së cilës nuk është bërë i ditur, ka lindur në Itali, vend ku familja e saj jeton prej shumë vitesh. Tashmë 18-vjeçari i arrestuar do të përballet me akuzën e ngritur ku materialet proceduriale i kanë kaluar Prokurorisë pranë Gjykatës së Shkallës së Parë për Krimet e Rënda në Tiranë për veprën penale ?Shtrëngimi me anë të kanosjes ose dhunës për dhënien e pasurisë?. /Citynews