Rama dy, si proverbi “Gusht e gunë”

28 Gusht 2017, 06:35, Aktualitet CNA

Nga Leonard Olli

– Nga çasti kur Rama bëri publike në Asamble emrat me të cilët do qeverisë vendin, në fazën e parë të mandatit të dytë, duket se vëmendjen më të madhe e morën emrat e ministrave. Jo se nuk përbën lajm si cilët janë individët që do të drejtojnë dikasteret e ekzekutivit shqiptar, por dihej qartë se ata do të përfaqësonin ndërthurjen e komunistëve me neokomunistët, duke mos patur shumë gjëra në dorë, pasi Rama do të drejtojë gjithçka, ashtu si sikundër veproi në mandatin e parë. Shpresoj që ky interes të jetë vetëm në këtë moment të parë, pasi thelbi problematik mbetet struktura e re qeverisëse, ndaj së cilës ende nuk ka shumë reagime.

Zhdukja e disa ministrive, miksimi pa lidhje i disa të tjerave apo krijimi i superministrive, nuk është thjesht çështje konceptimi, por prioritetesh. Kjo qasje është një tregues i qartë i ujërave ku po lundron Rama. E vetmja gjë e sigurt që kupton nga kjo strukture e re është se ai, si gjithmonë, ose nuk ka asnjë busull ose po vijon planin e rrënimit të plotë të vendit.

?Asgjësimi? i ministrisë së Integrimit dëshmon se pavarësisht pretendimeve të kryetimonierit integrimi i vendit jo vetëm që nuk i intereson, por përkundrazi është një proces që qëllimisht është frenuar dhe tashmë ka shumë gjasa të vijojë në vendnumëro. Bashkëngjitja me Ministrinë e Jashtme do të ndalë të gjitha praktikat e deritanishme, duke futur në kolaps proceset integruese. Të shpresosh se Bushati do të menaxhojë edhe integrimin, pasi ka dështuar totalisht në politikën e jashtme, është një veprim sa i qëllimtë aq edhe keqdashës. Po kaq dramatike është eliminimi i Ministrisë së Mirëqenies Sociale dhe Rinisë, ku gjatë mandatit të parë hoqi prioritet punë, punësim, që në mënyrën më elokuente dëshmon se qytetari dhe problemet e pafundme të tij, më varfërinë e ulur këmbëkryq në çdo familje, janë krejtësisht jashtë vëmendjes së socialistëve. Sistemi i asistencave dhe pagesave të individëve më aftësi të kufizuara do të çorientohet, duke i rënduar edhe më shumë këto shtresa.

Kalimi i këtij dikasteri në varësi të Ministrisë së Shëndetësisë jo vetëm do të sjellë vështirësi pa fund në këtë dikaster, i cili edhe në këtë moment është ndër më problematiku, por do të rëndojë edhe më shumë situatën.

Infrastruktura dhe transporti u provua pa asnjë ekuivok që nuk ishin dhe nuk përbëjnë asnjë interes për kryeministrin, duke lënë në mëshirë të fatit jo vetëm dhjetëra vepra madhore publike që u braktisën në mandatin e parë, por do jetë dështim edhe më madh në lidhje me zhvillimin e projekteve madhore me përthithjen e financimeve nga BE, duke i dhënë dërmën përfundimisht si korridorit të 8-të ashtu dhe zhvillimit të rrjetit hekurudhor brenda vendit dhe përfshirjen e Shqipërisë në rrjetin hekurudhor ballkanik. Një dëm i pallogaritshëm në zhvillimin ekonomik të vendit, që e largon rrezikshëm Shqipërinë nga pozita kyçe e nyjës lidhëse Perëndim-Lindje.

Po kaq enigmë mbetet edhe fati i Ministrisë së Zhvillimit Urban dhe Planifikimit të Territorit, e cila pavarësisht se dështoi më sukses në mandatin e parë, ka rol shumë të rëndësishëm në zhvillimin e ekonomisë, pasi planifikimi i territorit është thellësisht përcaktues. E ardhmja e të rinjve nuk përbën interes në tepsinë Rama. Çështjet rinisë kanë ndërruar sërish dikaster, i janë dhënë Ministrisë së Arsimit, ku, ndoshta, duhet të ishin integruar që në mandatin e parë. Çështjet e mjedisit duken të parëndësishme për Ramën, pasi ia ka kaluar ministrisë së Turizmit, ku jetime duken të jenë edhe çështjet e menaxhimit të ujërave, deteve dhe ato të peshkimit, të cilat luajnë një rol të dorës së parë jo vetëm në mbrojtjen e ruajtjen e mjedisit, por dhe zhvillimit ekonomik. E nëse gjatë fushatës çështjet e Administratës Publike ishin kryefjala e tij, në praktikë duket që nuk kanë asnjë interes, pasi nuk figurojnë askund, po kështu edhe çështjet e pushtetit vendor. Ndoshta do i rikthehen si kompetenca Ministrisë së Brendshme.

Në të gjithë katrahurë krijohet një përshtypje e parë pozitive nga shkurtimi i gati 8 dikastereve, por nga fakti konkret kupton se këto dikastere do të atashohen me ato ekzistuese bashkë me stafet e tyre. Por, lehtësisht ndjehet se kjo qasje do të krijojë një konfuzion afatgjatë, pasoja e të cilave do japë efekte të menjëhershme jo vetëm në ekonominë e vendit, por edhe në cilësinë e jetës së çdo shqiptari. Krijimi i superministrive krijon hapësirat e nevojshme për praktikat më të preferuara të Ramës sikundër koncesionet dhe praktikat e tjera korruptive. Thënë shqip struktura e re qeverisëse i ngjan proverbit ?Gusht e gunë?. Zoti na ruajtë se çfarë dimri vjen pas!/Shkruar për CityNews.al