web counter
LEXO PA REKLAMA!

SHKARKO APP

App Store
Google Play

Viktimat e komunizmit/ Basha: Jetët e shkatërruara shqiptare, një akuzë e rëndë për shoqërinë

23 Gusht 2017, 13:54, Aktualitet CNA

Kryetari i Partisë Demokratike, Lulzim Basha ka bërë një postim në rrjetet sociale pak minuta më parë për Ditën Europiane të Kujtimit të Viktimave të Stalinizmit dhe Nazizmit.

Teksa shkruan se në Shqipëri dhjetëra mijëra shqiptarë humbën jetën nga dhuna e regjimit komunist, Basha shton se është e dhimbshme që ende nuk ka një monument të vërtetë për viktimat.

?Gati 100 milionë persona gjetën vdekjen nga komunizmi, të vrarë direkt për qëllime politike ose të vdekur si pasojë e mjerimit që komunizmi solli për miliona njerëz.

Në librin e errët të komunizmit, Shqipëria zë një vend të veçantë për nga egërsia kriminale e Enver Hoxhës dhe bandës së tij kundër popullit të tyre. Dhjetëra mijë shqiptarë humbën jetën nga dhuna e regjimit komunist shqiptar, të ekzekutuar me e pa gjyq dhe të vdekur në burgje. Qindra mijë u burgosën politikisht dhe u internuan në kampe. Një popull i tërë u izolua për afro gjysëm shekulli në karantinën më mizore të mjerimit, shtypjes dhe trushpëlarjes në Europë.

Sot, në Ditën Europiane të Kujtimit të Viktimave të Stalinizmit dhe Nazizmit, jetët e humbura dhe të shkatërruara nga stalinizmi shqiptar janë një akuzë e rëndë për shoqërinë tonë që nuk i dënoi asnjëherë plotësisht vrasësit dhe kriminelët komunistë, që nuk reflektoi seriozisht kundër ideologjisë, frymës dhe mentalitetit komunist e nuk i preu asnjëherë rrugën kthimit të komunistëve në pushtet.

Është e dhimbshme që ne nuk kemi ende një monument të vërtetë për viktimat e komunizmit, dhe nuk kemi ende një histori të vërtetë të krimeve të komunizmit. Ne nuk mund t?i shmangemi përgjegjësisë për dënimin e komunizmit, jo vetëm si detyrim moral ndaj viktimave të tij, por edhe si e vetmja mënyrë që të krijojmë një shoqëri të vërtetë të lirë dhe demokratike. Ky është mision i pambaruar, por i palëkundër i Partisë Demokratike?, shkruan Basha./CityNews





Lajmet e fundit nga