Aferat korruptive/Pse nuk anulon Rama koncesionet e Berishës

31 Korrik 2017, 08:52, Aktualitet CNA

Shqipëria çdo ditë e më shumë po kthehet në vendin ku gjithçka po jepet me koncesion. E vetmja gjë e padhënë është qeveria. Sot, mediat raportojnë se lejet e qarkullimit të mjeteve dhe procesi i shitjes së tyre do të bëhet nga privati, duke u dhënë me koncesion.

Pak vite më parë, është dhënë dhe kolaudimi i mjeteve nga ish-qeveria e Berishës. Koncesione të tjera të asaj kohe ishin Lotaria Kombëtare, pullat fiskale, markimi i karburanteve, HEC-et, si dhe skanimi në pikat e kalimit të kufirit.

Në atë kohë, pra kur qeveriste Berisha, Edi Rama për gjithçka dilte kundër, pra për ato shërbime, të cilat qeveria e Berishës i dha me koncesion për të përmirësuar shërbimin dhe për të mbledhur të ardhura më shumë në buxhet.

Sot, qeveria shqiptare nuk ka lënë gjë pa dhënë me koncesion, e vetmja që ka ngelur është thjesht dhe vetëm administrata.

Rama ka dhënë me koncesion Check-up, laboratorët, shërbimin e hotelerisë në spitale, instrumentet dhe shërbimin në sallat e operacioneve, djegien e mbeturinave spitalore. Mund të themi se në spital pa koncesion janë vetëm doktorët.

Argumentet e mësipërm po i përballim dhe me një fakt tjetër. Në vitin 2012, qeveria e Berishës zhvilloi një tender të hapur ndërkombëtar për një koncesion, siç ishte Lotaria Kombëtare. Atëherë, Edi Rama deklaroi publikisht se ditën që do vinte në pushtet do ta anulonte, ashtu siç tha dhe për shumë koncesione të tjera.

Në rastin e Lotarisë, ai i shkroi dhe një letër kancelarit austriak, duke paralajmëruar anulimin e koncesionit.

Me ardhjen në pushtet të Edi Ramës nuk ndodhi asgjë. Jo vetëm koncesioni i Lotarisë nuk u anulua, por Edi Rama po përpiqet të japë gjithçka me koncesion. Nuk i quan me këtë emër, por iu ka vendosur term tjetër, i quan 3P (Partneritet Publik Privat), që nuk është gjë tjetër veçse koncesion.

Dje na thoshte se Saliu po e shiste Shqipërinë, duke e dhënë me koncesion, e në qoftë se qeveria e Berishës ka dhënë 5 apo 6 shërbime koncesionare, Edi Rama po jep gjithçka me koncesion.

Disa shërbime të dhëna prej tij janë krejtësisht skandaloze, siç është rasti i Check-up, ku shqiptarët më shumë po traumatizohen nga analizat e pavlera të kompanisë të lidhur me kryeministrin, ndërkohë që shërbimi paguhet qindra milionë euro.

E në qoftë se dje Berisha dha Lotarinë me koncesion, Edi Rama sot ka dhënë kontrollin e lojërave të fatit, megjithëse premtoi se do t?i mbyllte këto të fundit, ashtu siç tha për Lotarinë dhe koncesionet e Berishës. Por, sot Edi Rama nuk ka anuluar asnjë koncesion, thjesht dhe vetëm ka dhënë gjithçka që mundi./CityNews