Eurokomisioneri i BE u shuan shpresat shqiptarëve/Jeni shumë larg anëtarësimit

12 Korrik 2017, 10:54, Aktualitet CNA

Samiti i katërt për Ballkanin Perëndimor, i cili ka mbledhur liderët e rajonit dhe drejtues të lartë të unionit, po mbahet në Trieste.

Samiti është pjesë e procesit të Berlinit, i cili është iniciuar në vitin 2014 nga kancelarja gjermane Angela Merkel. Synimi kryesor është përgatitja ekonomike e vendeve të rajonit përpara integrimit në Bashkimin Europian.

Punimet e samitit të Triestes pritet që të zhvillohen pasditen e sotme. Komisioneri për zgjerim Johanes Hahn, i ka paraprirë samitit duke folur integrimin e vendeve të Ballkanit në Bashkimin Europian. Hahn tha se po vijojnë bisedimet me Serbinë dhe Malin e Zi, ndërsa vendet e tjera të Ballkanit, sipas tij, janë shumë larg. Kjo ka zbehur edhe shpresat e vendit tonë për një antarësim të afërt në BE.

Gjatë intervistës, Komisioneri për Zgjerim ka theksuar rëndësinë e zonës ekonomike rajonale, që sipas tij do të krijonte deri në vitin 2025 rreth 80 mijë vende të reja pune në të gjithë rajonin.

Ai vlerësoi faktin se zhvillimi ekonomik do të ndikonte edhe në përmirësimin e proceseve gjyqësore.

?Mendoj se ne duhet t?i përgatisim këto vende edhe në aspektin ekonomik, nëse këto vende janë tërheqëse për investitorët e huaj, por edhe për qytetarët që jetojnë këtu, kjo sigurisht që do të ketë një ndikim pozitiv në gjyqësor. Nëse këto vende dëshirojnë të kenë më shumë investime të huaja, duhet të kenë edhe një gjyqësor të pavarur?, tha Hahn.

Më pas, Hahn u shpreh se zona ekonomike do të krijojë një zinxhir vlerash, do të rrisë qarkullimin e lirë të mallrave dhe shërbimeve, do të çlirohen energjitë e një tregu ku jetojnë mbi 20 milionë banorë.

Liderët botërorë që marrin pjesë në samit janë kancelarja gjermane Angela Merkel, presidenti i Francës, Emmanuel Macron, kryeministri i Italisë, Paolo Gentiloni, shefja e Politikës së Jashtme të BE-së, Federica Mogherini, si dhe zyrtarë të lartë të Austrisë, Sllovenisë, Kroacisë dhe Britanisë së Madhe.

Ndërsa nga liderët e Ballkanit Perëndimor në samit janë kryeministri i Shqipërisë, Edi Rama, kryeministri i Kosovës, i Malit të Zi, Serbisë, Maqedonisë dhe Bosnje e Hercegovinës.

Kancelarja Merkel pritet të paraqesë një plan për krijimin e një hapësire të përbashkët ekonomike, të quajtur ?Berlin Plus?. Ky plan synon që integrimi ekonomik i rajonit të mbështesë edhe reformat sociale, politike e të tjera.

Plani parashikon edhe fonde për ndërtimin e infrastrukturës dhe zhvillimin e teknologjisë./CityNews