Sa u shit një mandat deputeti nga Lulzim Basha?

28 Maj 2017, 12:26, Aktualitet CNA

Partia Demokratike publikoi listën e kandidatëve për deputetë dhe përgjegjësinë për hartimin e saj e mori ekskluzivisht, kreu i PD, Lulzim Basha.

Ky i fundit tha se e kishte pasur të vështirë zgjedhjen, megjithëse Basha në veprimin e tij ka bërë aktin e radhës së shkeljes së statutit të PD.

Por pse Basha shkoi përtej shkeljes statutore? Kreu i PD e pranoi se ishte ai përzgjedhës, kritere nuk ka shpalosur në asnjë rast publikisht, standarte lista nuk ka, përfaqësimi gjinor nuk ekeyiton, klientelizmi politk ka pushtuar listën, pa përjashtuar mediokritetin dhe injorancën e kandidatëve të Bashës.

Një i ri nga Vlora dje shkruante se për një mandat ishin dhënë edhe 500 mijë euro, në fakt kryesuesit e listës së këtij qarku janë njerëz anonimë, por me lidhje me biznesin. Bashës dhe PD i duhen lekë për fushatë dhe ndoshta për këtë arsye apo edhe për ndonjë tjetër që nuk e dimë i ka shitur këto mandate.

Në fakt Vlora nuk është një rast i izoluar, disa dhjetëra mijë euro janë paguar, për të pasur emrin në listën e Dibrës, në Shkodër thuhet se një nga kandidatët ka paguar para që të hynte në listën fituese, në Durrës gjithashtu.

Në qarkun e Korçës, në listën fituese sërish është një person që ka deklaruar se ka paguar dhjetëra mijë euro për të qenë pjesë e listës së fitores, ku mungon kreu i PD së Korçës dhe përpara tij është një ish drejtor i shkarkuar me ceremoni nga Berisha, pasi akuzohej për korrupsion.

Në rast se do të ishte vetëm Vlora, vendi ku PD nga mungesa e fondeve është detyruar të vlerësonte ofertat që vinin nga biznesi dhe bënte transparente financimet e vërteta, kjo ndoshta deri diku edhe mund të pranohej.

Kjo nuk ka ndodhur, ajo që thuhet është se lista nuk u ndërtua në selinë e PD. Lista u ndërtua tek zyra e kompanisë të familjes së Lulzim Bashës, ku edhe dyshohet se janë ata personat që kanë ndërtuar listën zyrtare të PD.

Flitet që mandatet kanë variuar nga 50 mijë deri në 500 mijë euro. Shuma të cilat mund të bëjnë disa milionë euro, që nuk shkojnë në PD, por në llogari të kompanisë së familjarëve të Lulzim Bashës, e cila i shërben imazhit të kreut demokrat.

Lista e PD mesa duket nuk i shërbeu demokratëve, por kompanisë së familjarëve të Lulit, të cilët shitën mandate deputetësh me dy arsye, të plotësojnë fondet për fushatën, por edhe të mbushin xhepat e tyre në kurriz të militantëve dhe idealistëve të Partisë Demokratike.

Ajo që ka paraqitur Basha është lista e tij, e familjarëve të tij, e pazareve të tij, që e ka kthyer fatkeqësisht PD në një Shpk, për interesa personale dhe korruptive./CityNews