E fundit!

11:01 Aktualitet

Klodjan Braho mesazh të qartë politikës: Për SPAK të gjithë janë të barabartë para ligjit

Kreu i SPAK Klodjan Braho i ka përcjellë mesazhin e qartë ...

Haberet e Mitros/ Berisha nën hijen e Bashës?

28 Maj 2017, 20:10, Aktualitet CNA

Viti 2013. Basha u zgjodh Kryetar i PD-së. Bëra një haber: De juro Kryetar është Berisha. Vetëm kur ta kthejë PD-në pushtet, Basha do jetë Kryetar de juro dhe de fakto i demokratëve.
Gabova.

Nuk ka më dyshime: Berisha nuk është “timonier” i demokratëve.
Basha fshiu nga listat Topallin, Boden, Rulin, Bregun, Patozin, Tafain etj. Me kurajo. Pa i pyetur. Brenda një nate. Askush nuk besonte. Bile as vetë Berisha.
Për këtë bëmë më shumë çirren analistët. Kanë arsye: Nuk u doli fjala!
Po të zotët e punës? Dikush hedh shkelma. Një tjetër bën ironi. Dikush godet me pambuk.
Ideja ime.

Së pari. PD-ja nuk është baras me grupin parlamentar. Janë rreth 50-70 mijë anëtarë. Ka një Këshill Kombëtar. Ka një Kryesi. Të “vjetrit” kanë nga 25 deri në 17 vjet deputetë ose ministra. Pse vetëm këta i ka bërë nëna për të qënë deputetë?

Të gjithë flasim për karriere. Të gjithë thonë se duhet gjak i ri. Por në se të vjetërit janë “betonuar” si deputetë, a ka vend për karriere?

Në vitin vitin 1996 Jozefina u zgjodh deputete. Grua me kulturë. Nga der? e madhe. Jo rrallë pinim kafe. Flisnim për politikë. Bënim humor. Ishte grua modeste. Me kalimin e viteve ngjiti shkallët e politikës. U bë zë me peshë në parti. Me autoritet gati gati sa Berisha….
Pas 21 vjetëve grupin e Shkodrës e drejton Romeo Gurakuqi. Po ti krahësojmë si fillesa, Romeo është nivel më lart se Jozefina. Profesor. Me disa libra. Me dhjetra artikuj. I preferuar nga analistët dhe gazetarët.

Majlinda Bregu është nga mikeshat e mia më të veçanta. E nisi politikën në vitin 2005. Nga KOP deputete. Pastaj ministre. Pa diskutim ministrja më me zë në ministrinë e Integrimit. Me kurajo. Deri në desidente. Por brënda radhëve të partisë. Me miq të shumtë në Bruksel, që i bindi për ti dhënë vendin që meriton opozitës.

Por në krahësim me fillesat e Majlindës si politikane, Rudina Hajdari vjen si zë i veçantë.
Astrit Patosi. Miku im i vjetër. Modest. Shoqëror. Kryeredaktori më jetëgjatë i RD. Por vlerat e vërteta si deputet, i tregoi kur dorëzoi “dy nishanet” që i dhuroi Berisha: Nën kryetar i PD-së dhe kryetar i grupit parlamentar. Për katër vite shkëlqeu. Nakatosi gazetarinë me politikën. Debatet e tij në parlament do mbeten leksione për deputetët. Demokratë e socialistë. Ironik. Cinik. Thumbus. Me batuta. Me metafora. Brilant.

Por Patosi që ka punuar 20 vjet me Berishën kryetar, e di më mirë se kushdo, që liderët nuk duan deputetë të fjalës së artë. Liderët duan deputetë që ulin e ngrejnë kartonat si robot. Dhe Astriti nuk është për shijet e Bashës. Mbeti jashtë.

Ruli! Politikani më i zgjuar që ka gatuar parlamenti në kohë moderne. Me nuhatje si asnjë deputet. Dha dorëheqje, pa i lënë kënaqësinë Bashës ta fshinte nga listat. E dyta dorëheqje në karierën e tij të gjatë: Në vitin 1994 si ministër i Financave.

Sikur të lexojmë pak histori? Në shkurt të vitit 1992 u bë mbledhja e Kryesise së PD-së për listat e deputetëve në zgjedhjet e 22 Marsit. Isha edhe unë anëtar i Kryesisë. U vendos: Jo të gjithë anëtarët e Kryesisë duhet të jenë në listat për deputetë.

Një vendim historik, që për fat të keq u hodh në kosh të plehrave, në radhë të parë nga Berisha.
Mendoj që ka ardhur koha që statusi i deputetit të ketë një tavan: si Presidenti, Prokurori, Avokati i Popullit etj. Ka deputetë si Berisha, Gramoz Ruçi, Pandeli Majko, Ilir Meta etj që janë thinjur në dyert e parlamentit.

Së fundi nga radha por jo nga rëndësia? A duhet të ishte në listën Basha, ish kryeministri Berisha? Une mendoj: Jo! Për mirë a për keq ketë e ka gjykuar Basha. Është e drejta e liderit../CityNews