Lulzim Basha nuk zhgënjen kurrë

27 Maj 2017, 09:31, Aktualitet CNA

Kreu demokrat dje u ka paraqitur një listë shqiptarëve, një listë kandidatësh, përballë asaj të socialistëve në pushtet, një listë e cila nuk zhgënjen pritshmëritë.

Në rast se lista do të kishte pasur minimumin e disa normave dhe parimeve, pak kritere të ruajtura me fanatizëm nga Basha ajo do të ishte një vlerë. Por ka ndodhur krejtësisht e kundërta, kriteri i vetëm i përzgjedhjes në shumicën e qarqeve është servilizmi dhe besnikëria ndaj qëndrimeve të kryetarit edhe kur ato janë idiotësi me okë.

Lulzim Basha nuk zhgënjen kurrë me paaftësinë e tij për të shkatërruar gjithçka që i del përpara. Shumë demokratë nuk kanë pse të mërziten, sepse me shumë dyshime ajo nuk është më Partia Demokratike, por ish PD ku Basha u zgjodh kryetar me vota të falsifikuara.

Lulzim Basha nuk zhgënjeu me abuzimin e tij në rrugën Durrës-Kukës, nuk zhgënjeu me shitjen e detit, nuk zhgënjeu as me vrasjen e 4 të pafajshmëve në 21 janar, nuk zhgënjeu as kur humbi Bashkinë e Tiranës, të cilën e fitoi me rinumërim dhe në 4 vite nuk bëri gjë tjetër, thjesht fjeti gjumë.

Lulzim Basha nuk zhgënjeu katër vite në drejtimin e Partisë Demokratike. Aq shumë i suksesshëm ishte sa ende sot e ka partinë pa kryetarë në gjysmën e Shqipërisë, të përçarë të lodhur dhe të sakatuar, sepse ai nuk ka standard, nuk ka kriter, Lulzim Basha vepron sipas interesit, llogarive të shkurtra, pa folur edhe për atë që i çon një shuk me lekë.

Lulzim Basha nuk zhgënjen me budallallëkun e tij të pashembullt, ku shkon dhe provokon në një moment delikat të forcës së tij politke, provokon demokratë, provokon shqiptarë, provokon veten e tij me çmendurinë e radhës.

Lulzim Basha nuk zhgënjen kur thotë se ka hequr ish ministrat e Sali Berishës, por në lista është më shumë se gjysma e ish ministrave të Berishës. Flamur Noka, Aldo Bumçi , Eduart Halimi, Genc Pollo, Enkilejd Alibeaj, Fjorjon Mima, Fatmir Mediu.

Lulzim Basha nuk zhgënjen, sepse po të kishim një listë tjetër, atëherë do të ishim çuditur, por kemi këtë listë, ku në Shkodër Partinë Demokratike e përfaqëson Nard Ndoka dhe mungon zonja Topalli.

Po si mund të zhgënjejë Ervin Salianji, Arben Ristani, Taulant Zeneli, Nard Ndoka apo ndonjë polic, kapterr, dhe ish kryekomunar hajdut në listë.

Lulzim Basha nuk zhgënjen kurrë, kur në listë ka ish bashkëpunëtorë të ish sigurimit të shtetit, apo zgjedh djalin e një ish sigurimsi si deputet.

Kush ka shpresuar që të kishte një listë ndryshe nga Lulzim Basha, nuk ka pse zhgënjehet, thjesht dhe vetëm për një arsye, është kaq i paaftë, kaq negativ dhe i pavlerë sa prej tij nuk mund të presësh asnjë lloj zhgënjimi./CityNews