Nga Mero BAZE/Të paktën lerini “meritën” e tërheqjes!

16 Maj 2017, 18:33, Aktualitet CNA

Tani ka pak rëndësi nëse PD do të pranojë të hyjë në zgjedhje, duke u kujtuar që paketa McAllister është e mirë, apo që Basha ka marrë garanci se nuk do të preket kupola e Republikës së vjetër. Gjëja më e vërtetë që shqiptarët kanë parë ditën e sotme, ishte fakti që Lulzim Basha nuk merrte dot një vendim të vetëm, pa shkuar nga SHQUP-i në selinë e re të Republikës së vjetër, tek kulla 22 katëshe ku ka zyrën Sali Berisha.

Pasi mbaroi takimin me aleatët, të cilët i kërkojnë me ngulm të hyjnë në zgjedhje duke gjetur një zgjidhje, Basha u ngrit e shkoi një orë në zyrë të Berishës. Aty nga fundi i bisedës thirrën dhe Fatmir Mediun, për të qarë të tre hallet si njerëz që mund të preken nga Vetingu.

Ishte fjala të pranonin paketën McAllister, duke shtuar votimin dhe numërimin elektronik. Ky i fundit natyrisht kundërshtohet rreptë dhe prerë nga OSBE-ODIHR, jo vetëm për arsye logjistike, por dhe pasiguri në një rezultat real.

Pastaj doli dhe shkoi takoi përsëri aleatët. U dha atyre pak më shumë shpresë, se është duke folur me Berishën dhe amerikanët. Pastaj u rikthye sërisht tek kulla e Berishës. Sipas përshkrimit gastronomik që bëri kur doli herën e dytë, kishte ngrënë dhe makarona e sallatë me të, në pritje të orës 16:00, kur duhet të kthente një përgjigje.

Për ta bërë dhe më qesharake situatën, kishte mobilizuar filozofin e çadrës dhe dishepujt e tij në shtyp, që kishin folur për ?Republikën e Re? dhe që kishin bërë copë paketën McAllister, duke theksuar se ky gjermani është një njeri që nuk e kupton Shqipërinë, dhe që tani nisën ta quajnë zgjidhje që i jep garanci opozitës. Biles aq shumë e lavdëruan si paketë, sa po kontrolloja veten mos kisha thënë ndonjë fjalë kundër saj, pasi mbaja mend që kisha mendim të kundërt me ta qysh ditën që u paraqit.

Nuk i paragjykoj njerëzit që reflektojnë dhe e kuptojnë që nuk ja dalin dot duke shpikur realitete të paqëna dhe kriza artificiale. Është më mirë të reflektojnë dhe të tërhiqen qoftë dhe në mënyrë qesharake, se sa të shkojnë drejt greminës.

Por ajo që ka bërë Lulzim Basha sot është e neveritshme pikërisht për këtë shkak. Ai i doli zot vetë ?Republikës së Re?, dhe bëri çmos të distancohej për këtë nga Sali Berisha në opinion, duke e quajtr vepër të tij. Edhe pse të gjithë e dinim që tek ajo retorikë boshe pa asnjë pikë logjike e tij, ishte vetëm gjuha dhe frymëzimi i Berishës, sërisht ja pranuam si budallallëk të tij, e jo të Berishës.

Tani kur e pa që nuk ja doli dot me ?Republikën e Re?, të paktën të dijë të marrë meritat e tërheqjes dhe mos t?ia lërë dhe ato Berishës.

E dimë që ai e futi në çadër, ai e bëri ?dele të zezë? në Perëndim, ai e garantoi se nuk do ta heqë njeri nga partia edhe pas bojkotit, e dimë që ai ja shantazhoi kundështarët brenda partisë si të ?deklasuar?, por të paktën këtë meritën e tërheqjes nga ?Republika e Re?, ta merrte për vete, siç mori pa meritë dhe shpalljen e lindjes së saj.

Jo se i duhet për ndonjë gjë kjo ?dekoratë?, por të paktën krijojmë më shumë siguri, që si lider i ardhshëm, kur bën ndonjë budallallëk, si ky që bëri deri në krim, di dhe të tërhiqet. Duke ja lënë Berishës dhe këtë meritë, pra tërheqjen nga marrëzia e ?Republikës së Re?, na krijon pasigurinë e një djali ?aguridh? që ta bën gjëmën sa herë t?i teket Berishës, pasi nuk mban asnjë përgjegjësi se ç?bën vetë. Nëse do tërhiqej vetë, të paktën do mendonim që nuk është aq budalla sa dukej në çadër.

Për këtë arsye sot ngjante e neveritshme ajo ecejakja nga zyra e tij, tek çadra, e pastaj tek Berisha, për të na treguar se ?Republika e vërtetë?, nuk është as SHQUP-i, as çadra, por zyra e Berishës, në një kullë biznesi privat. Simbolikë e mirë e një njeriu që PD-në e ka biznes dhe Lulzim Bashën si administrator të deleguar.