Zbulohet skenari /PS-LSI nuk kishin 84 vota për Ilir Metën President

28 Prill 2017, 14:33, Aktualitet CNA

Sot në orën 17:00, Parlamenti pritet të zgjedhë Presidentin e ri të Republikës, sipas marrëveshjes së ?ngjalave? në Gjirin e Lalzit, në vitin 2012.

Skenarët për zgjedhjen e Presidentit ishte një lajm i vjetër për mediat dhe politikën, por me dyshime se mund të zbatohej. Kjo për faktin e vetëm se Ilir Meta shpesh deklaronte publikisht se nuk do të ishte ai Presidenti i vendit, por do të vazhdonte të qëndronte në politikë. Të tijët shpesh kërkonin që ai të ishte kryeministër i vendit.

Rama dhe Meta e kishin vendosur, që ky i fundit do të ishte Presidenti i Republikës, por i vetmi problem që ata kishin ishin numrat, dhe Ilir Meta nuk mund të zgjidhej dot President në tre raundet e para. Presidenti i Republikës që të zgjidhet kërkon 84 vota, aq sa kërkon edhe ndryshimi i Kushtetutës. Megjithëse kryeministri Rama dhe kreu i LSI, Ilir Meta, deklarojnë se i kanë ato vota, rezulton që për Ilir Metën President të mos kishin mbi 84 mandate, duke pasur parasysh edhe pamundësinë e trafikimit të votave nga opozita, e cila ka braktisur Parlamentin dhe ndodhet në çadër.

PS dhe LSI, përfshi dhe çamët e PDIU, në pamje të parë kanë 89 mandate, por Ilir Meta nuk u zgjodh dot President dhe nuk u fut në tre raundet e para, për shkak se ai nuk votohej nga të gjithë deputetët e mazhorancës aktuale. Edhe po të pranojnë se PS dhe LSI kanë 89 mandate, një llogari e thjeshtë aritmetike na jep numrat realë të vendeve në Parlament, që mund të sigurojë Ilir Meta si President.
Ben Blushi dhe Mimoza Hafizi janë dy vota kundër Ilir Metës. Tom Doshi është një tjetër votë kundër Ilir Metës. Eduart Ndocaj është një votë kundër Ilir Metës. Nga PDIU Aqif Rakipi dhe Mesila Doda, megjithëse së fundi firmosën, me shumë gjasa votonin kundër Ilir Metës si President. Një deputet i LSI ndodhet jashtë vendit për arsye shëndetësore. E pasigurt për Metën ishte dhe vota e kristiandemokratëve. Pa lënë mënjanë edhe ndonjë deputet socialist, që ka qenë kritikë ndaj Metës, apo nga ata që besojnë se PS fiton vetë pa LSI, të cilët në votim të fshehtë mund të votonin kundër, përfshi këtu dhe faktin që Meta nuk votonte për veten e tij.
Për të shmangur këtë humbje në tre raundet e para Rama dhe Meta vendosën që të mos rriskonin dhe gjithçka ta kalonin në raundin e katërt. Pra, sot ujërat janë më të qeta dhe më të qarta.

Dhe ndoshta Ilir Meta mund të marrë më shumë vota se sa pret, për shkak se tashmë mund të zgjidhet President edhe pa numrat e duhur kushtetues prej 84 votash. Sot Meta mund të zgjidhet me 71, 80 apo 85 vota, kjo nuk ka rëndësi, ai do jetë Presidenti i Republikës. Vetëm nga pas ka lënë një lajm: Për Ilir Metën President, Edi Rama dhe Ilir Meta nuk kishin 84 mandate deputetësh, të gjitha të tjerat janë thjesht justifikim./CityNews