E fundit!

11:27 Aktualitet

Ç’punë kanë çunat e Albinit në protestat e Shqipërisë?

Në protestat e zhvilluara gjatë këtyre ditëve në Tiranë ja...

Monopolet dhe oligopolet gjunjëzuan Qeverinë

20 Prill 2017, 06:52, Aktualitet CNA

Platforma ekonomike dështoi tërësisht

Qeveria “Mustafa”, sipas analistëve, ka dështuar me platformën e saj ekonomike, duke mos arritur që ta çlirojnë tregun vendor nga dukuria e dekadës së fundit – monopolet dhe oligopolet e inkriminuara që janë të lidhura me Qeverinë dhe po punojnë për interesa të pushtetarëve të inkriminuar me pozita të larta. Analistët dhe opozita me të drejtë thonë se për rrjedhojë po e pëson e ardhmja e vendit, duke i dështuar investimet e huaja dhe rritjen e prodhimit vendor. Ata thonë se e tëra kjo po bëhet nga sundimtarët aktualë për t’i hapur rrugën gjithnjë e më shumë produkteve nga Serbia. Analistët dhe opozita kanë dalë me idenë, sipas së cilës Qeveria jonë duhet të vendosë kufizime për një gamë produktesh tanimë të dyshuara për linja të veçanta nga Serbia, që prodhohen vetëm për tregun e Kosovës. Deputeti i opozitës, Enver Hoti (Nisma për Kosovën) tha se tashmë kemi tregues të mjaftueshëm për dështimin e ekonomisë, sikurse që janë rënia e investimeve të huaja dhe atyre direkte, ikja e investitorëve vendorë e të huaj, nuk ka përpunim të produkteve vendore dhe ajo më e keqja, Serbisë iu ka hapur rruga që ta vërshojnë tregun kosovarë dhe shqiptar. “Aq më keq furnitorët kryesorë të produkteve të mallrave nga Serbia janë instaluar edhe në pozita të larta shtetërore, sikurse që është rasti i zëvendëskryeministrit të Kosovës”, ka thënë ai.

AUVK-i nuk e kreu punën e vet

Sipas Hotit, në të gjitha komunat ku qeverisin serbët, si në Graçanicë, në Shtërpcë e gjetiu në tregun e tyre as që mund të gjesh ndonjë artikull nga Kosova. “Aq më keq, ata furnizohen me produkte të Serbisë nga njerëz që janë funksionarë të lartë të Qeverisë së Kosovës”, u shpreh ai. Opozitari Hoti tha se tanimë në aspektin ekonomik- tregtar jemi shndërruar në një vend që ka pësuar invazion të mallrave serbe nëpërmes njerëzve tanë që janë në Qeverinë e Kosovës dhe oligarkëve që janë të instaluar në Qeveri dhe jashtë saj dhe që të njëjtët punojnë ngushtë e së bashku. “Kjo po ndodh, ngase grupet joformale të bizneseve po i mbajnë monopolet dhe oligopolet dhe për pasojë të kësaj jeta e qytetarëve tanë dita- ditës po vështirësohet dhe po keqësohet”, theksoi më tutje ai. “Bizneset e ndershme, si rezultat i këtyre monopoleve dhe oligopoleve, që po tentojnë të ngrihen në këmbët e veta nga presioni i kësaj Qeverie, po eliminohen dhe po shkatërrohen”, potencoi ai. Opozitari Hoti ka komentuar se përse nuk ka kundërmasa ndaj Serbisë. “Kjo po ndodh, ngase AUVK-u duhet të marrë masa, sidomos ndaj produkteve që janë vija të veçanta për Kosovën dhe tregun shqiptar”, tha ai. Sipas Hotit, krerët e AUVK-ut nuk e kanë kryer punën si duhet, ngase ka dyshime të mëdha për cilësinë dhe përmbajtjen e atyre produkteve serbe që po futen në Kosovë. “E tëra kjo po ndodh nga kapja e shtetit dhe po ruhet ekonomia joformale dhe monopolet nga grupet e interesit që janë tash në pushtet”, u shpreh më tutje deputeti Hoti.

Parandalimi i importeve të rrezikshme

Ekonomisti Dardan Grapci tha se kjo Qeveri ka dështuar nga momenti kur i ka dhënë hapësirë monopoleve të inkriminuara dhe duke i lënë rehat pushtetarët nëpër pozita të larta që të kenë qasje në bizneset, të cilat janë kompani të mëdha në Kosovë. “Prodhimi vendor ka rënë dukshëm, për shkak të importimit të prodhimeve nga Serbia, Maqedonia dhe Shqipëria, në veçanti të atyre prodhimeve serbe, të cilat kanë afat të shkurtër kohor të konsumimit duke bërë që shitja në Kosovë të jetë në një afat të shkurt apo më mirë të them t’u ndryshohen datat e skadimit brenda depove ku qytetarët të helmohen me produktin e skaduar dhe të mykur “, theksoi Grapci. Ai vlerëson se Qeveria Kosovës ka dështuar në luftimin e këtyre importeve serbe që po bëhen në Kosove nga biznesmenët kosovarë. ” Kjo ngase qytetarët çdo ditë po ankohen nga shëndeti, duke e mos ditur arsyen pse, prandaj qytetarët e Kosovës duhet të jenë të vëmendshëm se cilat produkte po i blejnë, sepse nesër jeta e tyre mund të jetë në rrezik nga ndonjë sëmundje kancerogjene apo ka ndonjë helmim i planifikuar nga prodhuesit serbë”, u shpreh Grapci. Ndërsa, sa u përket derivateve të naftës, analisti Grapci tha se pompat e benzinës, që janë në Kosove, duhet të largohen nga marrëveshja me kompanitë serbe, dhe të bëjnë marrëveshje me ndonjë kompani nga Shqipëria. Sipas Grapcit, kryeparlamentari Kadri Veseli, së bashku me kabinetin qeveritar, duhet ta fusin në ligj embargon për Serbinë, duke mos u lënë hapësirë prodhuesve serbë dhe biznesmenëve nga Kosova të bëjnë importimin e mallrave dhe derivateve nga Serbia, në bashkëpunim me Policinë e Kosovës.

Pakoja fiskale e pamjaftueshme

Ish-deputeti i Kuvendit të Kosovës, Xhevdet Neziraj tha se nuk po shihet nga Qeveria e vendit se është duke bërë diçka kundër monopoleve dhe që të bëjë diçka më shumë në përmirësimin e bilancit tregtar shumë negativ dhe me të ardhura kombëtare më të voglat për kokë të banorit në rajon. “Qeveria duhet të veprojë kundër monopoleve, pasi i ka të gjitha mekanizmat që munden të ndalojnë këto veprime jashtëligjore, pasi mund të luftohet monopoli, korrupsioni me masa stimuluese, të rrisin prodhimtarin e vendit dhe te përmirësojnë bilancin tregtar që është duke e shkatërruar ekonominë e Kosovës “, tha ai. “Jam skeptik, sepse monopolet dhe korrupsioni, që e ka përfshirë vendin, nuk përmirësohet me këtë pako fiskale, dhe frikohem se me këtë pako do të favorizohen edhe më shumë bizneset që kanë monopol”, është shprehur ai. “Qeveritë para zgjedhjeve përmendin pakot fiskale për kinse rritjen e prodhimtarisë, zhvillimit ekonomik, por kur vijnë në pushtet nuk bëjnë asgjë, sikurse në fushatën e kaluar që premtonin qindra mijëra të punësuar dhe sukses i kësaj Qeverie është punësimi i militantëve të vet me kontrata mbi veprën”, tha më tej Neziraj./Kosova Sot