KQZ nxjerr kriteret/Kush mund të zgjidhet anëtar i bordit të monitorimit të medias

11 Mars 2017, 10:28, Aktualitet CNA

Komisioni Qendror i Zgjedhjeve ka publikuar kriteret që duhet të plotësojnë kandidatët që konkurrojnë për anëtarë të bordit të monitorimit të medias.

Ja deklarata e KQZ:

Jemi sot këtu për ndarë me ju shqetësimin që ka Komisioni Qendror i Zgjedhjeve, lidhur me njoftimin e organizatave jofitimprurëse të cilat operojnë në fushën e medias dhe në bazë të nenit 85/1, gërma c, të Kodit Zgjedhor, kanë të drejtë të propozojnë anëtarë të bordit të monitorimit të medias.

Komisioni Qendror i Zgjedhjeve, ju bën me dije se është i angazhuar të ngrejë Bordin e Monitorimit të Medias i cili do të monitorojë pasqyrimin e fushatës zgjedhore të 18 Qershorit 2017, në radio-televizionin publik dhe ato private. Për këtë arsye, i ka kërkuar Gjykatës së rrethit Gjyqësor Tiranë, listën e organizatave jofitimprurëse të regjistruara, që operojnë në fushën e medias dhe që në përputhje me nenin 85/1, të Kodit Zgjedhor, janë regjistruar të paktën 1 vit përpara datës së zgjedhjeve.

Komisioni Qendror i Zgjedhjeve menjëherë pas marrjes së kësaj liste ka bërë njoftimet e këtyre organizatave, sipas emrit dhe adresës të përcaktuar në vendimin e rregjistrimit në gjykatë, për të sjellin propozimet për anëtarë të Bordit të Monitorimit të Medias. Pas dërgimit të njoftimit në adresat e marra në vendimet e gjykatës për regjistrimin e tyre, KQZ konstaton me shqetësim se një pjesë e organizatave jofitimprurëse nuk e kanë marrë njoftimin.

Konkretisht nga 83 organizata në total, 57 prej tyre nuk e kanë marrë njoftimin dhe sipas përgjigjes së Shërbimit të Postës Shqiptare,
shkak i mos marrjes së njoftimit nga organizatat, ka qenë fakti se adresat të cilat janë marrë nga vendimet e gjykatës, nuk janë të sakta.

Komisioni Qendror i Zgjedhjeve përmes kësaj deklarate publike, ju bën thirrje të gjithë organizatave jofitimprurëse që operojnë në fushën e medias dhe që janë pjesë e listës së vënë në dispozicion nga Gjykata e Rrethit Gjyqësor të Tiranës, të sjellin pranë KQZ-së propozimet e tyre, me jo më pak se 3 kandidatë për anëtarë të Bordit të Monitorimit të Medias, brenda datës 25 Mars.

Duam t?ju rikujtojmë organizatave, se kandidatët për anëtarët e BMM-së duhet të plotësojnë këto kritere:

a) Të jenë me arsim të lartë;
b) Të kenë përvojë pune, si gazetarë, jo më pak se tre vjet në median vizive ose atë të shkruar apo të jenë analistë ose studiues të mediave;
c) Të mos jenë dënuar për kryerjen e një krimi me vendim gjyqësor të formës së prerë;
d) Të mos kenë qënë anëtar të forumeve drejtuese të partive politike ne 3 vitet e fundit.

Listën e plotë të OJF-ve që operojnë në fushën e medias dhe që janë të regjistruara të paktën 1 vit përpara datës së zgjedhjeve, të cilën KQZ e ka marrë nga Gjykata e Rrethit Gjyqësor të Tiranës, do t?u shpërndahet të gjithë mediave por gjithashtu, do ta gjeni edhe në faqen zyrtare të internetit, www.cec.org.al. Ju faleminderit!/CityNews