Zbardhen debatet në mbledhjen e grupit/ PD kundër amnistisë dhe bojkot parlamentit

21 Dhjetor 2016, 16:50, Aktualitet CNA

Sot në mesditë është zhvilluar mbledhja e grupit parlamentar të Partisë Demokratike pas të cilës, kreu demokrat Lulzim Basha tha se PD dhe opozita kanë fituar betejën e parë, atë me dekriminalizimin dhe do ta fitojnë betejën me zgjedhje të lira dhe demokratike.

Por, ky qëndrim publik i Bashës nuk kishte të bënte aspak me atë çfarë ishte diskutuar në mbledhjen e PD.

Burime nga mbledhja i thanë citynews se deputeti demokrat Genc Ruli ka kërkuar që PD t?ju japë një shenjë shqiptarëve se do të bëjë një betejë të fortë me këtë qeveri.

Deputeti Ruli i ka kërkuar Bashës që PD të shikojë mundësinë e braktisjes dhe bojkotin e parlamentit për faktin se kjo qeveri dhe kjo mazhorancë, cdo ditë po përkeqëson dhe PD duhet të reflektojë dhe reagojë duke i dhënë një mesazh të vërtetë shqiptarëve se është në betejë me këtë mazhorancë. Gjithashtu, Ruli ka ngritur si shqetësim vonesën në kryerjen e reformës zgjedhore, tashmë kur data e zgjedhjeve të përgjithshme dekretuar.

Ish-ministri i Financave Riodvan Bode, duke folur në mbledhje ka theksuar se PD nuk mund ta braktisë parlamentin pa një kauzë dhe argument të fortë politik.

Deputeti Astrit Patozi i ka kërkuar Lulzim Bashës që PD të bëjë gati motorët elektoral, të kërkojë me çdo kusht reformë zgjedhore si garanci për zgjedhjet e ardhshme parlamentare.

Në këtë mbledhje ka folur edhe ish-kryeministri Sali Berisha gjatë diskutimit që është mbajtur në lidhje me qëndrimin që do të ketë PD në amnistinë e qeverisë ndaj të burgosurve për disa vepra të ndryshme penale, e cila ka marrë së fundmi miratimin e komisioneve parlamentare dhe pret nesër votimin në seancë.

Berisha ka theksuar se PD duhet të votojë kundër amnistisë së qeverisë sepse ajo ka qëllime politike, pasi amniston Armando Prengën dhe bëhet përpara zgjedhjeve. Ai ka nënvizuar se janë disa mijëra persona me precedentë penalë dhe kriminalë pa vuajtur dënimin për veprat e tyre kriminale.

Në fund grupi parlamentar i PD ka vendosur që nesër të votojë kundër amnistisë ndaj të burgosurve./citynews