Rama akuzon opozitën/Ju e liruat Lul Berishën

15 Dhjetor 2016, 12:22, Aktualitet CNA

Kryeministri Edi Rama i është përgjigjur akuzave të opozitës për lirimin e Lulzim Berishës nga foltorja e Kuvendit. Ndonëse PD i kërkoi sot Ramës shkarkimin e Vangjush Dakos nga detyra e Kryetarit të Bashkisë së Durrësit, për faktin se ka mbështetur kërkesën për lirimin e Lul Berishës, kreu i Qeverisë thotë se përgjegjës për këtë është vetë opozita.

Kjo, sipas kryeministrit, për faktin se PD ka bllokuar ligjin e Vettingut, i cili do të mundësonte pastrimin e sistemit të drejtësisë nga gjykatësit dhe prokurorët e korruptuar.

?Vendet anëtare mbështetin vijimin e negociatave për anëtarësim me vetëdijen se Shqipëria do të zbatojë vettingun. E thonë këta. E përsërisin këtë, por ju edhe sot nuk keni kurajo të tregoni me gisht se kush e liroi Lulzim Berishën, por vazhdoni të thoni se e liroi bashkia e Durrësit. Imagjino ku jeni ju.
Siç tregon ecuria në rrugën e negociatave të çelura edhe në Mal të Zi e Serbi, këto 5 prioritete janë shoqëruese deri në mometin e anëtarësimit. Nuk janë kushte, por prioritete që vendi duhet të përmbushë. Kusht është vettingu. Të tjerat janë dokrrat e dëshpërimit tuaj të pangushëllueshëm, jeni lëshuar nga zinxhirët e logjikës, për të hedhur çdo ditë, baltë, shpifje, akuza me shpresën se shqiptarët do ju besojnë ju. Vendet anëtare kërkojnë që Komisioni Europian të bëjë një raport të ri sapo Shqipëria të jetë gati me përmbushjen e këtij kushti.

Këshilli do të vlerësojë dhënien e datës për çeljen e negociatave sapo komisioni të relatojë fillimin e zbatimit të vettingut dhe vijimin e përmbushjes së 5 prioriteteve. Anëtarësimi është peng i PD që bllokon vettingut. Po i ikni ballafaqimit me të vërtetën. Është i domosdoshëm pastrimi i pallatit të drejtësisë nga gjyqtarët dhe prokurorët e korruptuar?, tha kryeministri Rama.