E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

Meta pret Ali Ahmetin: Të zbatohet marrëveshja e Ohrit

15 Dhjetor 2016, 19:25, Aktualitet CNA

Kryetari i Kuvendit, z. Ilir Meta, priti në takim kryetarin e partisë Bashkimi Demokratik për Integrim, z. Ali Ahmeti. Duke folur për median pas këtij takimi, z. Meta u shpreh se më i rëndësishëm se rezultati i zgjedhjeve të mbajtura më 11 dhjetor është stabiliteti i Maqedonisë.

Gjithashtu, Kryetari i Kuvendit theksoi zhbllokimin e krizës institucionale përmes zgjedhjeve të fundit, të cilat fatmirësisht u zhvilluan në një klimë shumë pozitive dhe demokratike.

Ndër të tjera, z. Meta nënvizoi se Maqedonia duhet të ecë përpara në rrugën e stabilitetit, të zgjidhjes së çështjes së emrit dhe njëkohësisht përparimit të proceseve integruese, si anëtarësimi në NATO edhe në BE.

Kryetari i Kuvendit deklaroi se të drejtat e shqiptarëve në Maqedoni duhet të shënojnë një progres shumë më të dukshëm e më të prekshëm, përmes një zbatimi sa më real e më konkret edhe të vetë Marrëveshjes së Ohrit.

Prononcimi i plotë i z. Ilir META

Meta, patët një takim me kryetarin e Bashkimit Demokratik për Integrim në Maqedoni z. Ali Ahmeti, cili ka qenë rezultati i bisedimeve duke patur parasysh situatën në Maqedoni pas zgjedhjeve të së dielës?

Ishte kënaqësi të prisja Kryetarin e Bashkimit Demokratik për Integrim në Maqedoni, z. Ali Ahmeti, i cili është në Tiranë për të zhvilluar disa takime. Në këtë drejtim mund të konfirmoj edhe një herë, se për ne më e rëndësishme se çdo gjë tjetër, dhe padyshim më i rëndësishëm se çdo lloj rezultati, është stabiliteti i Maqedonisë.

Është zhbllokimi i kësaj krize institucionale përmes zgjedhjeve të fundit, të cilat fatmirësisht u zhvilluan në një klimë shumë pozitive dhe demokratike. Gjë që u vlerësua edhe nga partnerët ndërkombëtarë, të cilët e kanë mbështetur Maqedoninë për të dalë nga kjo krizë dhe sigurisht për të ardhmen është mjaft e rëndësishme që ky proces të përfundojë në tërësinë e tij në mënyrën më demokratike.

Padyshim, për ne kryesore është që Maqedonia të ecë përpara në rrugën e stabilitetit, të zgjidhjes së çështjes së emrit dhe njëkohësisht përparimit të proceseve integruese, si anëtarësimi në NATO edhe në BE.

Ajo që është jashtëzakonisht shumë e rëndësishme për ne, që të drejtat e shqiptarëve të shënojnë një progres shumë më të dukshëm e më të prekshëm, përmes një zbatimi sa më real dhe më konkret edhe të vetë Marrëveshjes së Ohrit.

A pati një komunikim me z. Ahmeti në raport me lëvizjet që do të bëjnë partitë shqiptare atje për të arritur këtë konsensus që do ta kapërcejë situatën e krizës në Maqedoni pas këtyre zgjedhjeve? Ose çfarë i këshilluat ju z. Ali Ahmetit për ta kapërcyer këtë situatë?

Mesa di unë, z. Ahmeti, ka patur një prononcim për media pas këtij takimi. Por unë mund t?ju them se e vetmja mbështetje, sepse nuk mendoj se si z. Ahmeti ashtu edhe politikanë të tjerë shqiptarë në Maqedoni kanë nevojë për këshilla nga ne, por mbështetja jonë është për procese stabilizuese, demokratizuese, evropianizuese.

Dhe natyrisht, kur vjen fjala për të drejtat e shqiptarëve, për rritjen e bashkëpunimit ndërmjet faktorit shqiptar për të avancuar në të drejtat e tyre në kuadër të një Maqedonie më evropiane.