Bursat për në universite/Ja kushtet dhe kriteret që duhen plotësuar për të përfituar

15 Dhjetor 2016, 08:22, Aktualitet CNA

Të gjithë nxënësit që ndjekin studimet në institucionet arsimore publike të arsimit parauniversitar në vend, mund të përfitojnë bursa studimi. Këshilli i Ministrave ka miratuar dje edhe kriteret në bazë të të cilave duhet nxënësit mund të përfitojnë. Kriteri i parë është ai ekonomik, që do të thotë që një nga kushtet është që familjet e tyre duhet të trajtohen me ndihmë ekonomike. Sa u përket kategorive, përfitojnë nxënësit që vazhdojnë studimet në largësinë mbi 5 km nga vendbanimi i përhershëm i tyre; nxënësit që banojnë në zonat rurale që nuk kanë shkollë 9-vjeçare brenda rrezes prej 5 km, që plotësojnë kriterin ekonomik. Kriter tjetër përbëjnë edhe rezultatet e arritura.

Vendimi i qeverisë parashikon që nxënësit e arsimit profesional që kanë mbaruar vitin shkollor pararendës me të gjitha notat 10 përfitojnë bursë. Ndërkohë jashtë kriterit ekonomik mund të përfitojnë: ?a) Nxënësit që kanë përfituar statusin e jetimit; b) Nxënësit që kanë humbur kujdestarinë prindërore, me vendim gjykate të formës së prerë; c) Nxënësit që gëzojnë statusin ligjor të invalidit paraplegjik dhe tetraplegjik; ç) Nxënësit që gëzojnë statusin ligjor që nuk shikojnë apo nuk dëgjojnë; d) Nxënësit, fëmijë të personave që gëzojnë statusin e invalidit e përfitojnë pension invaliditeti dhe nuk kanë të ardhura të tjera; dh) Nxënësit e komunitetit rom dhe egjiptian, që regjistrohen dhe ndjekin arsimin e mesëm profesional; e) Nxënësit që janë identifikuar dhe trajtuar si viktima të trafikut të qenieve njerëzore dhe kanë humbur kujdesin prindëror; ë) Nxënësit, fëmijë të punonjësve të Policisë së Shtetit, të Gardës së Republikës, të Shërbimit për Çështjet e Brendshme dhe Ankesat, të Policisë së Mbrojtjes nga Zjarri dhe të Shpëtimit, të Forcave të Armatosura, të Shërbimit Informativ të Shtetit dhe të Policisë së Burgjeve, që kanë humbur jetën në krye dhe për shkak të detyrës?, thuhet në vendimin e Këshillit të Ministrave.

Në fillim të çdo viti akademik, por jo më vonë se data 15 dhjetor 2016, për këto kategori nxënësish, Ministria e Punëve të Brendshme, Ministria e Drejtësisë, Ministria e Mbrojtjes dhe Shërbimi Informativ i Shtetit si dhe institucionet e përkujdesjes sociale rezidenciale publike duhet të dërgojnë në njësitë bazë të qeverisjes vendore përkatëse ku ndjekin studimet listën e nxënësve përfitues.