Lufta për kreun e PS/ A po bashkëpunon Veliaj me Metën?

10 Dhjetor 2016, 11:30, Aktualitet CNA

Edhe pse Partia Socialiste ndodhet në pushtet, lufta për pasardhësin e Edi Ramës duket se ka nisur. Në vendet demokratike, rotacioni politik ndodh një herë në 8 vjet dhe duket se kjo mënyrë ka gjetur vend edhe në Shqipëri. Me një logjikë të tillë, qeveria ?Rama? pas 5 viteve do ta humbasë kontrollin e pushtetit dhe do të kalojë në opozitë. Rrjedhimisht, Rama nuk do të jetë më në krye të PS dhe dikush tjetër duhet ta marrë në drejtim.

Për këtë arsye, një luftë e ?ftohtë? ka nisur në kampin rozë dhe dy emrat më të përfolur për të zëvendësuar Ramën janë ministri i Brendshëm Saimir Tahiri dhe kryebashkiaku aktual Erion Veliaj. Ky i fundit, ka nisur edhe sulmet frontale ndaj Tahirit.

Bashkëpunimi i Veliajt me Metën

Ashtu siç kemi shkruar më sipër, për të marrë drejtimin e PS, Veliaj duhet që fillimisht ta nxjerrë partinë ku ai bën pjesë në opozitë. Por, Veliaj e shikon Metën si çelësin e nxjerrjes së PS në opozitë, qoftë tani, qoftë mbas 5 viteve. Këtë e vërtetojnë edhe deklartat ?zemërdashëse? të kryebashkiakut Veliaj ndaj Ilir Metës. Disa muaj më parë, ai u shpreh se po aplikon në Bashkinë e Tiranës modelin ?Meta?. Deklaratë e pakuptimtë kjo, pasi Veliaj bën pjesë në Partinë Socialiste dhe modeli ?Meta? nuk është se i lë shije të mirë socialistëve. Por, kjo deklaratë nuk është pika e vetme e kontaktit të Veliajt me Metën. Nëse hedh një sy nga administrata e Bashkisë, 30-40% e të punësuarve janë anëtarë të LSI-së. Shifër e lartë kjo duke parë pakënaqësitë e socialistëve, të cilët kanë mbetur pa punë pikërisht prej punësimeve të njerëzve të Metës.

Strategjia

Për të marrë drejtimin e PS, Veliaj e ka me patjetër një strategji. Bashkëpunimi me Metën dhe dalja e këtij të fundit nga koalicioni me PS do të ishte një shpresë për Veliajn, pasi me shumë mundësi, PS nuk e formon dot e vetme qeverinë. Kur kjo të ndodhë, Veliaj do ta ketë rrugën e hapur. Rama largohet nga PS, por edhe rivali i tij, Saimir Tahiri, do të ?vritet? pasi si pjesë e qeverisë ?Rama? do të dalë i copëtuar nga zgjedhjet dhe shanset që ai të triumfojë përballë ?lali? Erit do të zvogëloheshin së tepërmi. Kështu, Veliaj, me një gur vret dy zogj. Ai qëndron në krye të Bashkisë Tiranë, ndoshta edhe për një mandat, siguron votat e LSI-së në zgjedhjet e ardhshme lokale dhe kështu, mbetet i paprekur nga sulmet që opozita, LSI-ja dhe pakënaqësitë e qytetarëve do të drejtohen ndaj qeverisë në ikje ?Rama?.

Veliaj i paqëndrueshëm

Nga ajo që flitet lart e poshtë, duket se Veliaj e ka edhe një strategji të dytë, në rast se e para i del bllof. E gjithë miqësia me Metën mund të përkthehet edhe në një kalim të mundshëm të tij tek LSI. Veliaj njihet si një njeri ?shtegtar? sipas interesave. Ai u bë i njohur nga Lëvizja ?Mjaft? me të cilën rrëzoi nga qeveria Fatos Nanon, më pas krijoi partinë G99 dhe kur e pa që kjo forcë politike nuk pinte ujë, iu bashkua Partisë Socialiste së bashku me ndjekësit e tij nga Mjaft-i. U bë ministër i Mirëqenies Sociale dhe Rinisë, por aventura e re zgjati shumë pak dhe ambicia e tij dukej se ishte pikërisht Bashkia e Tiranës. Të gjitha këto shtegtime të Veliajt, të lënë të mendosh që nëse beteja me Tahirin, apo këdo tjetër për kreun e PS do të dështojë, ai mund të kalojë në radhët e LSI-së. Sigurisht, që këtu bëhet fjalë pas disa vitesh, ku edhe qëndrimet politike nuk do të jenë më të njëjtat. Nga ana tjetër, Meta e ka konsumuar imazhin e tij në krye të LSI dhe po kërkon një njeri të denjë për ta drejtuar. Duket se Veliaj është gati t?ia plotësojë këtë dëshirë krye LSI-stit që ka bërë gati valixhet e mëdha të plaçkave.

Sido që të ndodhë, bashkëpunimi i Veliajt me LSI-në duket i pashmangshëm. Jo më kot, Veliaj po përpiqet të marrë pas vetes disa eksponentë të lartë brenda PS si deputetë e ministra, por edhe bazën socialiste, pa lënë menjëanë atë të LSI-së. Në zërat e socialistëve thjeshtë dëgjohen shpesh ankesat për një bashkëpunim të mundshëm të Veliajt me LSI-në. Në betejat politike, njerëzit e Veliajt, të cilët nuk janë të paktë, nuk i mirëpresin kritikat ndaj LSI-së. Përkundrazi, në artikulimet e tyre (socialistëve të Veliajt) përballë bazës socialiste, shpesh herë trajtohet me indiferentizëm çështja e super-punësimeve të anëtarëve të LSI-së në Bashkinë e Tiranës si dhe akuzat për një tolerim nga ana e PS për faktin e rritjes së votave të partisë së Metës. Ky tolerim, nuk është gjë tjetër veçse dora e padukshme e Veliajt.