Skënder Gjinushi: Reformën zgjedhore e dështuan PS-PD dhe OSBE

9 Dhjetor 2016, 09:19, Aktualitet CNA

Data 9 dhjetor shënon përfundimin e afatit të punës së komisionit parlamentar të reformës zgjedhore. Komisioni gjatë gjithë kësaj kohe zhvilloi pak mbledhje, duke dështuar tërësisht në punën e tij. Ndërkohë, partitë e vogla të cilat në vijimësi kanë kërkuar realizimin e reformës zgjedhore, janë rebeluar jo pak nga dështimi i saj dhe akuzojnë si përgjegjëset kryesore për zvarritjen e reformës zgjedhore, Partinë Demokratike dhe Partinë Socialiste.

Kryetari i Partisë Social Demokrate, Skënder Gjinushi, thekson se mungesa e vullnetit e dy partive të mëdha ka sjellë zvarritjen e reformës zgjedhore.

Sipas Gjinushit, afati i punës së komisionit të reformës zgjedhore do të shtyhet sa për fasadë, pasi dihet që dy forcat e mëdha nuk e kanë në axhendën e tyre këtë reformë.

Gjithashtu, Skënder Gjinushi thotë se OSBE e ka tepruar disi me gjithë atë dokumentacion që duhet të shërbejë si referencë. ?Puna e komisionit ka dështuar sepse nuk ka pasur asnjë vullnet për ta bërë vërtetë këtë reformë. Mungesa e angazhimit ka qenë e ndërsjellët nga të dyja forcat kryesore politike. Unë mendoj se edhe këtë herë do të bëhet një tjetër makinacion duke e shtyrë afatin e komisionit të reformës zgjedhore, pra gjithçka bëhet thjesht për sy e faqe?, deklaroi Skënder Gjinushi.

Kryetari i PSD shkon edhe më tej duke vënë në diskutim edhe rolin që OSBE ka pasur në këtë proces. ?Me thënë të drejtën, OSBE e ka tepruar me gjithë ato dokumente edhe kërkesa, të cilat sipas mendimit tim nuk kanë bërë asgjë tjetër veçse kanë shërbyer si alibi për shtyrjen e realizimit të kësaj reforme. Është e qartë përpjekja për një eliminim të partive të vogla nga skena politike e vendit?, ka deklaruar Skënder Gjinushi.

Më tej jep edhe disa pika ku duhet të konsistojë reforma zgjedhore. ?Duhet të ndryshojmë gjërat e qenësishme. Duhet të bëhen ndryshime që ulin vullnetin e ndikimit politik. Duhet të ngrihen komisione sa më pak të ndikuara dhe të kontrolluara nga politika. Duhen vendime që të ulin vjedhjet, manipulimet, fjala bie teknologjia, me kamera. Nëse do të kishte vullnet gjithçka do të ishte përfunduar tashmë?, deklaroi Skënder Gjinushi.