E fundit!

14:27 Politikë

Rama: Nëse këtu do të kishte lavatriçe parash të pista, nuk do të mbyllnim kapituj me BE-në

Në aktivitetin e programit “Dyfisho sipërmarrjen tënde”, k...

Për mëmëdhenë e Rilindjes!

28 Nëntor 2016, 11:48, Aktualitet CNA

Sot është dita që festojmë Pavarësinë, ?Nëntorin e Dytë? të Ismail Qemalit. Një datë që të çon në reflektim për tu kthyer pas në kohë dhe për të hedhur një vështrim mbi mëmëdheun. Atë për të cilin flasin dhe përgjërohen sot, disa duke festuar edhe çlirimin, të tjerë duke pritur që të ikë nesër gjermani i fundit.

Sesa mëmëdhetare është klasa jonë politike mjafton të shohim këto 25 vite demokraci. Ende sot, palët nuk kanë sqaruar ditën se kur iku gjermani i fundit, në 28 apo 29 nëntor. Kanë jo pak, por 25 vite që grinden me njëri-tjetrin. Kaq shumë e duan mëmëdheun sa një datë nuk e gjejnë dot, për të festuar të gjithë bashkë, edhe sepse ashtu i ka dënuar fati për të qenë kundërshtarë.

Kaq shumë e duan këtë vend, sa në 25 vite e shkretuan dhe e shkatërruan çdo gjë që kishte nga e shkuara, qoftë edhe atë komuniste. Nuk i lanë pëllëmbë tokë pa grabitur dhe vjedhur, ish-ndërmarrje, institucione, privatizime korruptive, afera e pazare, që edhe sot nuk ndalen.

25 vjet dhe ende shqiptarët e këtij mëmëdheu nuk kanë ujë në shtëpi. Ende sot mëmëdheu është i pandriçuar, çelësin e dritave e hap dhe e mbyll një i korruptuar që atdhetarizmin e tij e ka të lidhur me tenderat, të cilat ose i bën me 99.99% të vlerës ose nuk i bën fare.

Sot pas 25 vjetësh shqiptarët përfaqësohen në tribunën e debatit nga kriminelë, trafikantë të veshur me imunitet politik. Sot pas 25 vjetësh kemi ministra ?vite e vite dritë larg? nga ata të Pavarësisë. Por sot kemi edhe të mëdhenjtë, Ilir Beqja, Damian Gjiknuri, Lindita Nikolla etj.

Atdhetarët sot festojnë të ndarë, edhe nesër do festojnë të ndarë, edhe pasnesër do të festojnë të ndarë, për sa kohë e shohin si plaçkë lufte që mund ta përdorin për ta ndarë mes tyre.

Çfarë mund të presësh tjetër në vitin e katërt të tortës dhe zhgërryerjes me të në mes të Tiranës, kur bashkinë më të madhe të mëmëdheut e drejton një gënjeshtar që del në media tre herë në ditë, që reklamon punët që nuk i bën vetë, që jep me koncesion çdo gjë që ka Tirana dhe përpara se të ndërtojë çerdhe, kopshte apo të ndihmojë njerëz në nevojë, hedh miliona euro për pllaka betoni në qendër të Tiranës. Vjedh nga mëngjesi deri në darkë me klientelën e tij, akuzohet edhe për vrasje fëmijësh. Por sot pas 4 vjetësh të tortës, ai drejton Bashkinë e Tiranës, merita e vetme është pluhuri dhe smogu që po mbyt mushkëritë e banorëve të kryeqytetit.

E si mund të mos jesh mëmëdhetar sot, kur në krye të vendit qëndron një Rilindas. Nuk është Ismail Qemali, ai e ngriti flamurin 104 vite më parë, por është ai që po jep me koncesion shëndetësinë, hipotekat, rrugët, muzetë. Nuk ka dhënë ende Kryeministrinë dhe shtëpinë e tij në Surrel. Është në krye njeriu i sukseseve të mëdha që në më shumë se tre vite qeverisje, nuk ka shtruar një centimetër rrugë. Njeriun që duhet falenderuar për meritën e tij të veçante se e gjelbëroi Shqipërinë anë e mbanë. Njeriun që kanabizoi vendin. Nuk është Ismail Qemali por është kryeministri ynë rilindas, i cili duke punuar për mëmëdhenë më shumë qëndron jashtë sesa në Shqipëri, dhe mban leksione demokracie dhe patriotizmi duke vjedhur e rrjepur çdo ditë shqiptarët dhe pasuritë e tyre. Ky është mëmëdhetari që të burgos nëse nuk paguan 30 mijë lekë drita, dhe është po i njëjti që jep 300 milionë euro koncesione për shpurrën e tij.

Sot kemi në pushtet Rilindjen, jo atë që do të donte Ismail Qemali, as atë që duan shqiptarët, por pasojën e 25 viteve demokraci. Dhe sot festojmë 104 vjetorin e pavarësisë ?të lumtur? me Rilindjen tonë në krye.

Ps: Nuk do të dilnin qindra e qindra faqe, për të treguar mëmëdhetarët, 25 vite demokraci dhe Rilindjen në pushtet./ Citynews