E fundit!

16:50 Aktualitet

Siguroi kushtet për të kryer vrasjen e Hajrullës dhe Matodashajt/ GJKKO shpall dënimin për Erio Zejnon

Gjykata e Posaçme ka dënuar me 7.4 vjet burg Erio Zejnon, ...

Skandali i CEZ/ Pse nuk dëshmon Lulzim Basha?

14 Nëntor 2016, 17:15, Aktualitet CNA

Pak më shumë se një vit më parë, skandali i CEZ, ishte aksioni kryesor i Partisë Demokratike. Nën shënjestrën e opozitës ishte kryetari i parlamentit, Ilir Meta. Ky i fundit akuzohej se kishte marrë ryshfet nga DIA, një kompani mbledhje borxhi, e cila hodhi në gjyq OSHEE-në.

Pronari i DIA, Kastriot Ismailaj, akuzohet për pastrim parash dhe mashtrim, i dyshuar se ka orkestruar një skemë mashtruese në mbledhjen e borxheve të CEZ.

Skema erdhi në jetë pasi CEZ bleu 76% të aksioneve të OSSH në vitin 2009 dhe duket se kishte për qëllim të influenconte në mënyrë të paligjshme politikanët shqiptarë. Sipas dokumentit të Clifford Chance në gjykatën e arbitrazhit më 30 qershor 2015, DIA ka përfituar gati 4.5 milionë dollarë gjatë periudhës nëntor 2010 ?deri në tetor 2011.

Ish-kreu i bordit të drejtorëve në CEZ, Jozef Hajsek, dëshmoi në arbitrazh se kryeparlamentari Ilir Meta, në kohën kur Ministrër i Jashtëm ka negociuar me çekët e CEZ për të punuar me Kastriot Ismailajn, pasi ky i fundit kishte mbështetjen e qeverisë.

Në atë kohë, kreu i PD, Lulzim Basha, akuzoi Ilir Metën si të përfshirë në këtë skandal. Basha deklaroi se Ilir Meta kishte frikë se mos Ismailaj do të përmendte emrin e Metës gjatë dëshmisë së tij. Atëherë, Basha ishte i sigurt se Ismailaj dinte dhe do të tregonte se Meta ishte pjesë e këtij skandali.

Pas më shumë se një viti, parlamenti ka ngritur një komision për hetimin e kësaj afere. Komisioni parlamentar për CEZ ka kërkuar një seancë dëgjimore me ish-ministrin e Ekonomisë Tregëtisë dhe Energjisë, Edmond Haxhinasto. Por, më herët janë kërkuar të dëshmojnë edhe ish-kryeminsitri Sali Berisha, si njeriu që firmosi marrëveshjen me CEZ.

I vetmi që nuk përmendet në listën e dëshmitarëve është kryetari i PD, Lulzim Basha. Deklaratat e tij për Metën një vit më parë ishin të qarta. Sipas tij Ismailaj dinte të vërtetën, që do të thotë se edhe Basha është implikuar në këtë histori, sepse deri në këtë moment Ismailaj nuk e ka treguar këtë të vërtetë që ai di, gjithmonë sipas Bashës.

Në situatën ku ndodhet sot komisioni hetimor për çështjen e CEZ, Lulzim Basha duhet të thirrej për të dëshmuar. Ai ka akuzuar Ilir Metën për aferën CEZ-DIA dhe sot dhe këto akuza publike ndoshta do të ishte më mirë ti bënte zyrtarisht si dëshmi në komisionin hetimor. Pyetja është: A do ta thërrasë për dëshmi, Edmond Spaho, në cilësinë e kryetarit të Komisionit Hetimor për çështjen e CEZ, Lulzim Bashën?

Dje Basha akuzonte publikisht Metën. Sot ai hesht. Ndoshta në këtë mes kanë hyrë pazaret politike. Kreu i PD, shpreson në një largim të Metës nga qeveria. Kjo shpjegon edhe mungesën e akuzave të PD ndaj LSI-së, jo vetëm për çështjen CEZ-DIA, por edhe për skandale të tjerat të ministrave të LSI-së. Basha pretendon që në zgjedhjet e vitit 2017 të zgjidhet kryeministër, dhe mungesa e akuzave ndaj LSI, tregon formën dhe mënyrën që Basha shpreson se do ta sjellë atë në krye të vendit./citynews

Më poshtë, video kur Basha akuzonte Metën për aferën CEZ-DIA