E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

A na kërcënon vërtet një atentat terrorist?/ Nga Blendi FEVZIU

11 Nëntor 2016, 11:52, Aktualitet CNA

Shqipëria ka qenë mjaftueshëm e angazhuar këto ditë për t?i kushtuar vëmendje një lajmi që nëse është i vërtetë, përbën një problem të rëndësishëm për vendin. Madje, përbën një pikë kthese që mund të modifikojë mënyrën e jetesës së shqiptarëve. Sipas raportimeve të shtypit, një celulë terroriste ka pasur në plan të kryejë një akt terrorist në stadiumin e Shkodrës në momentin e zhvillimit të ndeshjes Shqipëri?Izrael në fundjavë. Lajmi mbështetet nga tri veprime që janë kryer ndërkohë.

E para, për arsye sigurie, ndeshja është transferuar nga Shkodra në Elbasan, pasi kishte filluar edhe shitja e biletave.

E dyta, në Shkodër dhe në Prishtinë u arrestuan 13 persona që akuzoheshin si organizatorë dhe ideatorë të këtij akti të mbetur në tentativë. Dhe e treta, për ekipin e Izraelit u vendosën masa sigurie të panjohura më parë në vend, madje shumë herë më të përforcuara se ndaj ekipit serb në vjeshtën e kaluar. Bashkë me këtë, Elbasani është blinduar me agjentë të policisë, shërbimit sekret dhe policisë gjyqësore për të siguruar qetësinë e nevojshme për ndeshjen.

Në anën tjetër, shtypi i Izraelit foli akoma më qartë për një atentat dhe sqaroi se shërbimi inteligjent i Ushtrisë Izraelite e ka këshilluar federatën e atij vendi që ekipi të mos udhëtojë drejt Shqipërisë për arsye të rrezikut që e kërcënon.

Të gjitha këto janë vetëm raportime të shtypit. Personat e arrestuar e kanë mohuar me forcë akuzën, përmes avokatëve dhe familjarëve të tyre. Ata kanë deklaruar se arrestimi është bërë si paragjykim ndaj besimit të tyre dhe jo për një kërcënim terrorist. ?Opinion.al? ka arritur të mësojë disa detaje më shumë që nuk janë bërë publike. Sipas të dhënave që ne kemi siguruar, pak javë më parë, shërbimi sekret Izraelit, Mosad, ka arritur të informohet dhe më pas të interceptojë në një nga zonat e konfliktit në Lindjen e Mesme, një plan për të goditur ekipin e Izraelit gjatë ndeshjes së tij në Shkodër më 12 nëntor. Ndjekja e planeve të atentatorëve ka çuar fillimisht në Kosovë e prej këtej në Shkodër.

Oficerë të shërbimit inteligjent izraelit dhe të një prej shërbimeve partnere më të rëndësishme në botë kanë mbërritur në Prishtinë dhe Tiranë duke dhënë informacione për persona të dyshimtë. Ka disa të dhëna jo të verifikuara qartë, por mendohej si për një atentat ndaj ekipit të Izraelit, ashtu edhe për vendosjen e një sasie eksplozivi në tribunën qendrore. Asnjë nga këto të dhëna nuk vërtetohet dot. Personat e arrestuar e kanë përgënjeshtruar kategorikisht, por autoritetet këmbëngulin që kanë regjistrime dhe përgjime që vërtetojnë tentativën. Fijet e tij çojnë deri tek një personazh i njohur me kombësi shqiptare që lufton në Siri. Kujdesi i autoriteteve ka qenë që lajmi të mbahet sa më sekret përpara ndeshjes, por arrestimet e kanë bërë atë publik.

Nuk dihen më shumë detaje dhe nuk dihet se sa e sigurt është e gjitha kjo, por nëse është e vërtetë, Shqipëria dhe Kosova hyjnë në një fazë të ndryshme të kërcënimit që vjen nga ekstremizmi. Deri më sot kemi folur për ekstremizëm islamik. Për probleme përjashtimi, urrejtjeje, mërie dhe ndasish. Deri më sot kemi pasur gjuhë të ashpër dhe të papranueshme, por jo akte konkrete terroriste. Nëse rasti vërtetohet, dhe shpresoj shumë që kjo të mos ndodhë, atëherë kalojnë në një fazë tjetër, në atë të terrorizmit. Edhe pse e para është fillesa e të dytës, mes ekstremizmit dhe terrorizmit, qëndron një hendek i madh. Një hendek, që Shqipëria duhet ta ktheje në një oqean të pakalueshëm për të ruajtur shtetasit e saj, stabilitetin dhe të ardhmen e të gjithëve ne.