E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Zgjedhjet në Dibër/A do angazhohen drejtorët milionerë të OSHEE dhe administrata në mbështetje të Ramës

21 Gusht 2016, 15:30, Aktualitet CNA

Zgjedhjet për Kryebashkiakun e Dibrës duket se po trajtohen jo vetëm si një test nga opozita dhe mazhoranca, por edhe si një tregues force. Kur kanë mbetur 3 javë nga data kur mbi 50 mijë dibranë do të votojnë për zgjedhjen e qytetarit numër 1 të Bashkisë së Peshkopisë, tonet mes palëve duket se do të ashpërsohen, po kështu edhe makineria zgjedhore.

Opozita me problemet e saj ka hyrë në këtë proçes me një nga figurat më dinjitoze të Grupit të saj Parlamentar, Sherefedin Shehun, i cili në 2013 u mandatua si deputet nga të njëjtët qytetarë që më 11 shtator do t?I duhet të votojnë për postin e Kryebashkiakut. Opozita nuk ka se çfarë humb në këtë betejë zgjedhore, për faktin se në 2015-ën, Bashkia e Dibrës u fitua nga Shukri Xhelili, i mbështetur nga koalicioni ASHE i drejtuar nga PS, por i shkarkuar pas një skandali seksual, ku për një vend pune, kërkonte favore seksuale.

Në anën tjetër, PS ka përzgjedhur në garë një mjek, Muharrem Rama, kandidaturë e cila erdhi pas asaj të Kreut të Tatimeve të Bashkisë së Dibrës, emri i të cilit u lakua si kandidat zyrtar, por më pas PS u tërhoq nga ky vendim, duke nxjerrë si kandidat një mjek. Veç lojrave me kandidatët dhe kostos që ka nga ish-Kryebashkiaku Xhelili, PS hyn në këtë proçes me probleme të shumta në koalicion, veçanërisht me LSI-në, e cila deri më tani nuk është shprehur në mbështetje të kandidatit socialist, madje asnjë nga funksionarët lokalë të kësaj partie, nuk është angazhuar në fushatën e tij.

Në kushte të tilla duket se përballja e 11 Shtatorit, nëse do të respektohen standardet zgjedhore dhe do të ketë rregulla të pastra loje, favorizon dukshëm Sherefedin Shehun, i cili mbështetet zyrtarisht nga 12 parti, ndërkohë që 6 të tjera, nuk arritën të regjistroheshin zyrtarisht si pjesë e koalicionit opozitar, por kanë shprehur mbështetje të plotë ndaj kandidatit të PD-së.

Por nga mënyra sesi po trajtohen zgjedhjet e 11 Shtatorit, vështirë që PS të pranojë humbjen, aq më tepër në një bashki që e fitoi 1 vit më parë me kandidaturën e Shukriut. Dyshimet janë se me kalimin e ditëve, në fushatën e PS mund të angazhohen drejtues të administratës lokale, të institucioneve lokale, jo vetëm të Bashkisë së Dibrës, por edhe Bashkive në kufi me të. Fakti që fushata e PS në Dibër drejtohet nga ministri i Energjitikës, Damian Gjiknuri, ngreh dyshime se në mbështetjen e kandidatit Muharrem Rama mund të rreshtohen ato që quhen drejtorët milionerë, por që realisht janë drejtuesit e OSHEE.

Po kështu dyshimet janë që me kalimin e ditëve dhe ofrimin e datës së zgjedhjeve, në mbështetje të kandidatit të propozuar nga Rilindja, mund të angazhohen edhe institucionet e tjera si Tatimet, kjo edhe për faktin se drejtuesi i tyre, u përfol si një kandidat deri në momentin e fundit, çka do të thotë se me një urdhër partiak, angazhimi i administratës që drejton është 100 % i sigurtë.

Partia Demokratike denoncoi presionet që po ushtrohen ndaj arsimtarëve, pavarësisht se në reagimin e Ministrisë së Arsimit kjo u konsiderua si shpifje. Pavarësisht se kush do të rezultojë fitues më 11 Shtator, zgjedhjet në Bashkinë e Peshkopisë, janë një gur prove për Qeverinë Rama në aspektin e garancive për respektimin e standardeve zgjedhore. Nëse për një bashki, që nuk konsiderohet e nivelit të parë, do të ketë tentativa për të manipuluar rezultatin, për të blerë vota, apo për të angazhuar administratën shtetërore përmes presioneve, atëherë ajo që mund të ndodhë në zgjedhjet e përgjithshme parlamentare është e paimagjinueshme. /citynews/