4000 biznese të regjistruara kalojnë në statusin pasiv

10 Gusht 2016, 14:47, Aktualitet CNA

Gjysma e bizneseve në vend kanë kaluar në statusin pasiv. Nga 180 mijë biznese të regjistruara në vend, të raportuara statistikisht, nga 1 korriku rezultojnë zyrtarisht 95089 biznese pasive. Vetëm në dy muajt e fundit statusin biznes pasiv e kanë marrë 4000 biznese.

Sipas monitor.al lista e bizneseve që nisi të bëhet transparente në fillim të majit të këtij viti ishte rreth 91 mijë biznese, më pas më 1 korrik me përditësimin e fundit nga Drejtoria e Përgjithshme e Tatimeve numri arriti në 95 mijë të tilla.

Aplikimi i sistemit të ri informatik në tatime dhe ndryshimet në ligjin e procedurave tatimore në fillim të vitit që shkoi ka mundësuar krijimin e regjistrit pasiv të tatimpaguesve.

Sistemi informatik i tatimeve bën automatikisht klasifikimin në biznes pasiv duke shmangur procedurën manuale të inspektorëve tatimorë.

Kushti kryesor për ndryshimin e statusit të një biznesi nga aktiv në pasiv është mosushtrimi i aktivitetit tregtar nga ana e subjektit për një vit rresht, pra kur një biznes nuk bën asnjë deklaratë tatimore. Krahas kësaj biznesi duhet të ketë shpallur pezullimin e aktivitetit në Qendrën Kombëtare të Regjistrimit.

Duke parë këtë situatë Ministria e Financave sqaron se nga 180 mijë biznese që raportohen statistikisht, ku gjysma e tyre që rezultojnë me statusin e biznesit pasiv e të regjistruar që nga viti 1991, ka patur qindra parregullsi të vlerësuara për to ndër vite. Shumë prej tyre kanë falimentuar, por nuk e kanë shpallur falimentin, apo janë mbyllur dhe nuk e kanë kryer procesin e mbylljes, apo kanë kaluar në pasivitet ligjor dhe nuk janë pastruar kurrë nga regjistrat.

Pastrimi i regjistrit është marrë si një nga masat anti-evazion.

Drejtoria e Përgjithshme e Tatimeve ka krijuar tashmë një regjistër me bizneset realisht tatimpagues. Ky regjistër duhet administruar rigorozisht duke përjashtuar bizneset që nuk paguajnë për dy apo tre periudha tatimore rresht.

Bizneset mund të futen sërish në regjistër vetëm pasi të kenë shlyer detyrimet, por teksa lista e bizneseve pasive është publike, askush nuk mund të verifikojë listën e pastër të bizneseve.

Ndërsa lista tjetër e bizneseve jo korrekt mund të verifikohet nëse spekulon me faturat e TVSH dhe kjo duhet t?i bëhet e ditur menjëherë publikut.

Pjesa tjetër e bizneseve që janë në listën e ?pastër? e marrin automatikisht rimbursimin e TVSH-së. Ndërkohë programi për kthimin e TVSH duhet të kontrollojë nëse furnizuesi nuk është në listë pasive dhe do të paralajmërojë tatimpaguesin se furnizuesi i tij nuk është i autorizuar të lëshojë fatura të TVSH-së.

Nga ana tjetër dogana nuk duhet të përpunojë importet ose eksportet për tregtarët që nuk janë në regjistrin e pastër. /Citynews