Afera e Ramës me 1700 hektarë në Karpen/ Fluturon pasurinë e shqiptarëve sa në Londër sa në Singapor nëpër kompani fantazëm

29 Korrik 2016, 10:38, Aktualitet CNA

Partia Demokratike ka akuzuar sot kryeministrin Edi Rama për koncesionin e Karpenit në Kvajë. Përmes një deklarate për mediat, deputetja e PD Jorida Tabaku, tha se kjo është një nga aferat më të dyshimta dhe më korruptive të këtyre 3 viteve.

Ao tha se me një të rënë të lapsit, Edi Rama dha 1700 hektarë tokë në zemër të vendit, në një prej zonave më të kushtueshme. Sipas saj, kompania që mori të drejtën e ndërtimit u shit papritur në Singapor, në një parajsë fiskale atje, vende që vizitohen shpesh nga vëllai i kryeministrit

Deklarata e Jorida Tabakut

Pasi krijoi mjegullën e duhur me zhurmën për reformën në drejtësi, Edi Rama urdhëroi kartonat e tij në parlament për të kaluar një prej aferave më të dyshimta e korruptive të këtyre tre viteve, sic është koncesioni i Karpenit në Kavajë.

1700 hektarë tokë në zemër të vendit, në një prej zonave më të kushtueshme, i fluturoi Edi Rama me një të rëndë të lapsit sa në Londër, sa në Singapor, nëpër kompani fantazëm, dhe sot që flasim askush nuk e di se cilin bëri shefi i rilindjes pronar të kësaj pasurie të shqiptarëve.

Një projekt i dyshimtë, në mungesë totale transparence.

Fillimisht, Edi Rama ia dha këto 1700 hektarë kompanisë ?Star Bridge Port Development Ltd?, me qendër në Britani, e cila rezultoi me një kapital prej 100 paundësh. Ia dha kompanisë me 100 paund, me ca copa letrash ku flitej për ndërtimin e një kompleksi laraman, me lloj lloj objektesh të planifikuara aty.

Kjo kompania 100 paundëshe, sipas Edi Ramës do na investoka 5 miliardë dollarë në Karpen, aq sa gjysma e produktit të brendshëm bruto.

Nga ana tjetër, qeveria nuk tregon se në cilin plan territorial është mbështetur, në cilin plan zhvillimor është menduar, ku është studimi i feasibilitetit dhe ku është projekti duke shtuar edhe më shumë hijet e dyshimit.

Por më e rënda është se kjo kompani, që Edi Rama e bëri pronare të 1700 hektarëve, u shit papritur në Singapor, në një parajsë fiskale atje, vende që vizitohen shpesh nga vëllai i kryeministrit. E njëjta skemë si me koncesionin e TVSH që opozita kundërshtoi dhe detyroi q everinë të tërhiqej.

Ky së bashku me Koncesionin e Rrugës së Kombit, është një skandal mbi skandalet në përmbledhjen e gjatë të abuzimeve 3 vjecare të Edi Ramës.

Si mundet një kryeministër të hedhë sa në një cep të botës në tjetrin 1700 hektarë të pasurisë kombëtare? Si mundet të flakë në rugë pronat e 220 familjeve që nuk e dinë se cdo të ndodhë nesër me ta?

Kush fshihet pas këtij projekti?

Cilat janë interesat personale të Edi Ramës?

Cili klient favorizohet nga këto afera?

Edi Rama duhet të bëjë urgjentisht transparencë e të japë llogari për këtë rast. Partia Demokratike do të vendosë para ligjit autorët e do të vazhdojë të denoncojë këtë koncesion korruptiv e këtë zhvatje të pasurisë së shqiptarëve, si shumë afera të tjera të kësaj qeverie e oligarkëve të saj!