Deklaratat e Metës, asnjë reagim nga Rama/Çfarë zgjidhje mund të gjejë Rama për të mos lejuar Qeverinë teknike?

17 Korrik 2016, 15:17, Aktualitet CNA

Kryeministri Edi Rama ende nuk ka reaguar në lidhje me deklaratën e bërë nga aleati kryesor i tij në qeverisjen e vendit, Ilir Meta, i cili paralajmëroi që pas 21 Korrikut vendi do të ketë një qeveri teknike që do t?a çojë drejt zgjedhjeve të parakohshme.

Deklarata e Metës ishte mëse e pritshme po të kihen parasysh përplasjet e vazhdueshme mes tij dhe Kreut të Qeverisë. E ndërsa Meta bëri të ditur vendimin e tij, pritet se çfarë zgjidhje do të gjejë Kryeministri dhe kryetari i Partisë Socialiste.

A do të pranojë Rama faktin e rrëzimit të Qeverisë së tij dhe krijimin e një qeverie teknike, apo priten surpriza, duke tentuar të ofrojë deputetë që do të mbanin në këmbë qeverinë në rast të një mocioni mosbesimi?

Për të marrë një vendim, qoftë edhe formalisht, Rama duhet të mbledhë Kryesinë e Partisë Socialiste, anëtar i së cilës është edhe Koço Kokëdhima. Dikur mik me Ramën, sot një nga kundërshtarët e tij, ndoshta më të ashpër, në rradhët e PS-së, Kokëdhima është ofruar shumë me Kreun e LSI-së. Kjo do të thotë se çdo skemë që Rama mund të diskutojë me anëtarët e Kryesisë në prani të Kokëdhimës, mund ti dekonspirohet ende pa u mbyllur mbledhja.

Në kushte të tilla Rama nuk mund të konsultohet dot as me forumin më të lartë politik të partisë që drejton, edhe pse burime nga PS raportojnë se prej disa ditësh, Kryeministri ka nisur kontaktet individuale me deputetë të mazhorancës, në përpjekje për të unifikuar votat në rast të një mocioni.

Pas deklaratës së Ilir Metës, i vetmi socialist që ka reaguar është deputeti Erjon Braçe, i cili ka kundërshtuar propozimin e Kryetarit të Kuvendit, dhe i ëhstë përmbajtur linjës së referendumit për drejtësinë. Kjo është nga tezat që është artikuluar më parë edhe nga Pandeli Majko apo deputetë të tjerë socialistë. /citynews/