Kishte premtuar se do të fliste vetëm më 21 Korrik/ Çfarë ndodhi që Ilir Meta theu heshtjen mbi reformën

17 Korrik 2016, 12:47, Aktualitet CNA

Kryetari i Kuvendit Ilir Meta do të deklaronte më 28 Qershor, pas një vizite në një biznes fason në Cërrik, se për reformën në drejtësi do të fliste më 21 korrik, madje ai ka ftuar gazetarët të bëjnë durim.

Më konkretisht, i pyetur nga mediat, rreth 20 ditë më parë, Kryeparlamentari do të shprehej: ?për reformën në drejtësi duhet të pyesni Petrit Vasilin. Unë do të flas më 21 Korrik dhe deri atëherë ju duhet të bëni durim?.

Por sot, më 17 Korrik, Kryetari i Kuvendit, ka thyer heshtjen për reformën në drejtësi, apo siç u shpreh ai i sosi durimi, dhe ka dalë në një konferencë të posaçme për mediat, duke bërë sfiduar në rradhë të parë dy Ambasadorët Donald Lu dhe Romana Vlahutin, por edhe Kryeministrin Rama dhe kreun e PD-së, Basha për tu mbyllur të pestë në një nga zyrat e Kuvendit të Shqipërisë deri në gjetjen e zgjidhjes, ose në të kundër të 5 aktorët politikë dhe diplomatikë duhej të tërhiqeshin nga funksionet që kishin.

Por çfarë ka ndodhur që Meta nuk mbajti premtimin se do të fliste më 21 Korrik me reformën?

Në deklaratën për mediat, Kryetari i Kuvendit disa herë përmendi si shkak për mosgjetjen e konsensusit mes palëve, pikërisht kërcënimet me burg ndaj kundërshtarëve politikë. Madje, Meta solli në kujtesë edhe një ngjarje të 1993, kur atij i hoqën imunitetin si deputet dhe thirrej në Prokurori, ku çdo javë i thoshin se do të arrestohej.

?Unë s?kam pasur frikë nga burgu politik, dhe mendoj se asnjë politikan shqiptar s?duhet të ketë frikë nga burgu politik. Por nëse dikush ka me shumë qejf fjalën burg, atëherë ai duhet të thotë: reforma nis nga unë, nëse kam shkelur ligjin duhet të shkoj në burg?.

Nuk dihet nëse ndaj Kryetarit të Kuvendit, që drejton forcën e dytë qeverisëse në vend, ka pasur kërcënime apo paralajmërime nga brenda koalicionit qeveritar me fjalën burg, por referuar gjithë deklarimeve publike, i vetmi politikan që përmend shpesh fjalën burg është Kryeministri Edi Rama.

Në anën tjetër, në pothuajse të gjitha deklarimet publike, Ambasadorët Lu dhe Vlahutin, mesazhet për arritjen e konsensusit ia kanë drejtuar Lulzim Bashës dhe Edi Ramës, duke lënë disi në hije, Kryeparlamentarin Meta, i cili drejton forcën e 3-të më të madhe politike në vend.

Ndoshta lënia në hije dhe dyshimi se reforma mund të miratohej vetëm me konsensusin e PS-PD, është një nga arsyet sepse Meta nuk mbajti premtimin se do të fliste më 21 Korrik në lidhje me reformën. /citynews/