web counter
LEXO PA REKLAMA!

SHKARKO APP

App Store
Google Play

Negociatorët nga Kosova për mazhorancën socialiste

15 Korrik 2016, 13:25, Aktualitet CNA

Në kulmin e përplasjes mes Kryeministrit dhe Kryetarit të Kuvendit, për të cilën Citynews, ka raportuar përgjatë ditëve të fundit, Edi Rama nuk ka rreshtur së ofruari negociatorë për të bindur Ilir Metën për dy çështje, votimin e reformës në drejtësi, dhe vijimin e bashkëqeverisjes, duke pranuar riformatimin e qeverisë, sipas kushteve të përcaktuara nga Kreu i LSI.

Sikundër është raportuar , në Gjirin e Lalzit, Meta ka mirëpritur Presidentin e Kosovës, Hashim Thaçi, dhe publicistin Baton Haxhiu.

Mësohet se takimet janë zhvilluar pikërisht për të ulur tensionet mes Kryeministrit dhe Kryetarit të Kuvendit, edhe pse mesazhet që i janë përcjellë Edi Ramës nuk kanë qenë aspak pozitive.

Burimet theksojnë se qoftë Thaçi ashtu edhe Haxhiu nuk kanë mundur të bindin Metën, megjithëse duket se mes tij dhe Kryeministrit është rivendosur komunikimi i ndërprerë prej më shumë se 10 ditësh.

Në takimin e fundit mes tij dhe Ramës, 3 ishin çështjet e diskutuara, për të cilat drejtuesit e koalicionit qeveritar kanë rënë dakort vetëm për njërën, ndryshimet në Qeveri, edhe këto të imponuara nga Kryetari i LSI-së.

Ndërkohë për çështjen e reformës në drejtësi, Meta ka kundërshtuar Ramën për miratimin e saj në mënyrë të njëanshme, duke trafikuar vota nga opozita.

Për çështjen e 3-të që palët kanë ndarë qëndrime të ndryshme ka qenë ajo mbi ish-deputetin Koço Kokëdhima, i cili duket se ka shkëputur çdo komunikim me Ramën dhe është ofruar së tepërmi me Metën.   /citynews/





Lajmet e fundit nga