Gati Lega Nord/ Ja deputetët dhe lëvizja?

5 Korrik 2016, 09:08, Aktualitet CNA

Deputetët Tom Doshi dhe Eduard Ndocaj duket se po finalizojnë një lëvizje të re politike, e cila do të jetë gati për zgjedhjet e ardhshme parlamentare. Doshi dhe Ndocaj, deputetë në Qarqet e Shkodrës dhe Lezhës, i pari i përjashtuar nga Grupi Parlamentar socialist, ndërsa i dyti në prag të largimit nga ky grup, pritet të zyrtarizojnë forcën e re politike, e cila mund të jetë një nga surprizat në zgjedhje.

Mësohet se dy deputetët veç kontakteve dhe miqësisë së krijuar kanë menduar seriozisht për të qenë pjesë e Parlamentit të ardhshëm, por jo si deputetë të forcave aktuale politike, qofshin në qeverisje apo në opozitë. Dy deputetët kanë menduar që të përfshijnë në këtë lëvizje edhe ligjvënës apo ish-deputetë, të cilët sot ndjehen jo komodë në Grupet Parlamentare apo partitë ku bëjnë pjesë, rrezikojnë vendet e tyre si deputetë në zgjedhjet e ardhshme, apo janë lënë mënjanë nga strukturat partiake.

Burime pranë dy deputetëve shprehen për Citynews se do të synohet që të paktën në Qarqet Shkodër, Lezhë, Kukës dhe Dibër të ketë një përfaqësim sa më të gjerë me synim marrjen e sa më shumë mandateve. Në këtë kuadër, mësohet se lëvizjes së re pritet ti bashkohet Dritan Prifti, ish-ministër i Energjitikës dhe ish-deputet, i njohur për miqësinë e fortë të krijuar me Tom Doshin, sidomos pas denoncimit të video-skandalit ku përfshihej Ilir Meta, Kryetar i LSI-së.

Mësohet se dy deputetët janë në negociata me kolegë të tyre deputetë në rradhët e PD dhe PS, por edhe me ish-deputetë të këtyre forcave politike në kryesisht në qarqet e Veriut. Doshi dhe Ndocaj janë dy nga ligjvënësit të cilët kanë shprehur haptazi qëndrimin e tyre ndaj LSI-së së drejtuar nga Ilir Meta, çka do të thotë se lëvizja e re, do të synojë minimizimin e votave për partinë e dytë në koalicionin qeveritar, sidomos në 4 qarqet, ku LSI ka marrë deputetë në zgjedhjet e fundit parlamentare.

Ndocaj u angazhua fuqimisht në zgjedhjet vendore të 2015 kundër ish-Kryebashkiakut Viktor Tushaj, i propozuar nga LSI-ja, por i mbështetur edhe nga Partia Socialiste. Të njëjtin qëndrim mbajti edhe Tom Doshi në Qarkun e Shkodrës, duke u angazhuar në mbështetje të kandidatëve të propozuar nga PS, por duke qenë kundër LSI-së.

Nisur nga kjo duket se LSI veç përplasjeve që mund të ketë me aleatin e saj kryesor në qeverisje, në zgjedhjet e ardhshme parlamentare, duhet të mendojë edhe sesi të parandalojë rrjedhjen e votave, sidomos në Shkodër dhe Lezhë, ku Doshi dhe Ndocaj kanë një ndikim mjaft të madh.

Mësohet se dy ligjvënësit do të tentojnë të përfshijnë në lëvzjen e re të gjitha partinë Kristian-demokrake, me synimin krijimin e një lëvizjeje që do të maksimalizonte votat dhe do të kishte sa më shumë mandate deputetësh në Kuvend.

Nuk dihet nëse 3 partitë Kristian demokrate, përfshi këtu edhe PDK-në e Nard Ndokës do të jenë të gatshme të përfshihen në këtë lëvizje, tek e cila mund të ofrohen edhe 6 nga deputetët aktualë në Kuvendin e Shqipërisë, të cilët sot janë pjesë e PD-PS. /citynews/