E fundit!

21:15 Aktualitet

"Një çoban e denoncoi"/ Si ra policia e Korçës në gjurmët e autorit të vrasjes së efektivit

Gazetarja Glidona Daci, në një lidhje me emisionin Opinion...

Nga Spartak Ngjela/ 21 ditë ku gjithsecili duhet të mendojë të ardhmen

1 Korrik 2016, 07:13, Aktualitet CNA

Kaq kanë mbetur deri në 21 korrik. A do ta gjejnë fuqinë pesë ose gjashtë kalanderët e Saliut që të detyrojnë 30 deputetët e PD-së që të votojnë kundër historisë europiane të Shqipërisë?
Enver Hoxha, në verën e vitit 1961, ia doli që me shtatë kalanderët e Byrosë Politike dhe Sigurimin e Shtetit, ta shpëtonte veten nga ndëshkimi për krimet, duke e izoluar Shqipërinë deri në marrëzi.
Por ekuacioni i sotëm, me pesë ose gjashte kalanderët e Sali Berishës, është i kundërt. Sepse, në këtë rast, nuk do të jenë votuesit që do të izolojnë Shqipërinë dhe shqiptarët nga Perëndimi, por do të jenë Shtetet e Bashkuara dhe Bashkimi Europian që do të izolojnë deputetët që do të votojnë kundër Reformes. Dhe kjo nuk eshte e lehtë, sepse, edhe votuesit kundër që s’janë kalanderë, do të izolohen nga Perëndimi.
Kjo është arsyeja që Saliu dhe kalanderët e tij nuk mund ta arrijnë prishjen e votimit për drejtësinë shqiptare.
Është e turpshme sesi një grusht të korruptuarish kanë ende kurajë që të flasin për kapjen e Drejtësisë, kur të gjithë shqiptarët ndërkohë e dinë që drejtësia nuk ekziston sot në Shqipëri. Ajo nuk ka ekzistuar për 100 vjet në këtë shtet. Gjithçka që ka ndodhur është bërë në emër të saj, dhe çdo gjë që ka ardhur është vendosur si fryme kundër saj. Marrëzia e pushtetit politik shqiptar ka pasur gjithmonë një armik dhe një mik: armiku i saj ka qenë drejtësia, dhe miku i saj ka qenë abuzimi, krimi dhe frika që i duhej ndërkallur shqiptarëve.
Koha sot ka ndryshuar, dhe me 21 korrik në aulën e Kuvendit të Shqipërisë do të përballet drejtësia me frikën ndaj saj. Kush do të fitojë?
Arsyeja është edhe më shprehëse: kalanderët do të përplasen me shqiptarët dhe me Perëndimin. A nuk është për ta kjo rruga më me shumë rrezik?
Po të pakorruptuarit e Parlamentit Shqiptar ngase do tremben që duhet të votojnë përjashtimin e Shqipërisë nga procedura e pranimit në BE? Nga asgjë, sepse forca nuk është nga ana e kalanderëve që kanë abuzuar me pushtetin, por nga angazhimi amerikan dhe europiano-perendimor për Reformën shqiptare.
Prandaj, sipas logjikës aktuale historike: frika më e madhe qëndron te mos votimi i Reformes në Drejtësi. Në këtë rast: edhe arsyeja historike, edhe frika janë në favorin e Reformës. Prandaj ajo do të votohet më 21 korrik në Kuvendin e Shqipërisë, edhe pse kalanderët do ta vuajnë këtë votim.