E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vijuar hetimet ndaj shtetases Beli...

Përgjimi i paligjshëm, letra nga Italia rrëzon mashtrimet dhe alibitë e Tahirit

20 Maj 2016, 14:27, Aktualitet CNA

Skretari i PD, Arben Ristani tha përmes një konference për shtyp se letra e ardhur nga Italia në lidhje me pajisjen e përgjimt rrëzon mashtrimet dhe alibitë e Ministrit të Brendshëm, Saimir Tahirit. Sipas Ristanit, Fakti se paisja është futur në mënyrë të paligjshme tregon se ajo do të përdorej, sic është përdorur nga Saimir Tahiri në mënyrë të paligjshme. Ai tha se prokuroria duhet të zbardhë sa më shpejt këtë cështje, kemi të bëjmë me sigurinë kombëtare, me liritë dhe të drejtat themelore të njeriut, me interesin më të lartë publik.

Deklarata e PD

Debati për përgjimin e paligjshëm jo vetëm nuk është mbyllur, por përkundrazi skandali është thelluar akoma më shumë.

Letra e ish drejtuesit të policisë italiane konfirmon, pohon drejtpërdrejt, se paisja ka hyrë në Shqipëri ilegalisht.

Sepse një paisje e tillë, gjurmimi e përgjimi, është ilegale kur futet pa u regjistruar në doganë, dhe është ilegale kur përdoret pa u vënë në dijeni dhe pa dhënë miratimin e tij Prokurori i Përgjithshëm.

Fakti se paisja është futur në mënyrë të paligjshme tregon se ajo do të përdorej, sic është përdorur nga Saimir Tahiri në mënyrë të paligjshme.

Tahiri ka zgjedhur të tradhtojë të gjithë vartësit e tij që janë përlyer në këtë krim, duke thënë se nuk është përgjegjësi e tij.

Pyesni policinë, thotë Tahiri.

Pyesni doganat, thotë Tahiri.

Kërkon të lajë duart ministri i brendshëm, kur gjithkush e di se paisja ka hyrë, është përdorur, me porosinë e tij dhe me dijeninë e Edi Ramës.

Shihni kushtet e flagrancës ku janë kapur Tahiri e shefi i tij i policisë. Të dy thanë në fillim se një paisje e tillë nuk ekziston. Më vonë Tahiri e pranoi se pajisja ekziston.

Më pas Drejtori i Përgjitshëm i Policisë së Shtetit, Çako deklaroi në komisionin e sigurisë se pajisja nuk ekziston. Ndërkohë, ish drejtori i policisë italiane e hedh poshtë deklaratën e Cakos dhe thotë se pajisja ekziston, ka hyrë në Shqipëri dhe është përdorur.

Këto qëndrime kontradiktore, të mbushura me alibi e mashtrime, janë provë e krimit që kanë kryer Tahiri me vartësit e tij.

Prokuroria duhet të zbardhë sa më shpejt këtë cështje, kemi të bëjmë me sigurinë kombëtare, me liritë dhe të drejtat themelore të njeriut, me interesin më të lartë publik.

Por ky hetim që e pret mbarë vendi, pengohet çdo ditë nga qënia në detyrë e Tahirit dhe e Cakos dhe e rrjetit të tyre drejtues.

Ata duhet të largohen menjëherë nga detyra, që të kemi shpejt një drejtësi të plotë e objektive.