E fundit!

11:01 Aktualitet

Klodjan Braho mesazh të qartë politikës: Për SPAK të gjithë janë të barabartë para ligjit

Kreu i SPAK Klodjan Braho i ka përcjellë mesazhin e qartë ...

PD censuron Jozefina Topallin

22 Prill 2016, 11:11, Aktualitet CNA

Zyra e shtypit në Partinë Demokratike censuron fjalën në Kuvend dhe prononcimet për shtyp të deputetëve të saj. Nga një kërkim në faqen zyrtare të partisë më të madhe në opozitë, www.pd.al, rezulton se fjala e deputetes Jozefina Topalli nuk është publikuar në faqen online dhe as të jetë shpërndarë nga zyra e shtypit të kësaj partie. Censurë me urdhër apo papërgjegjshmëri servilash ?

Ish-kryeparlamentarja ka qenë ndër të parat që ka folur në seancën parlamentare që u zhvillua ditën e djeshme. Ajo bëri disa ndërhyrje dhe mbajti gjallë me akuza dhe debate parlamentarizmin opozitar, por asnjë prej tyre nuk u pasqyrua nga zyra e shtypit në PD.

Ne shkuam më tej dhe kryem një kërkim të shtrirë në një hapësirë kohore më të gjatë. Nga ky kërkim rezultoi se fjalimet e ish-kryeparlamentares dhe ish-nënkryetares të PD Jozefina Topalli janë pasqyruar shumë rrallë. Prej gati një viti, PD nuk ka pasqyruar asnjë fjalim të Jozefina Topallit. Postimi i fundit i fjalës së ish-kryeparlamentares rezulton të jetë më 24 prill i vitit 2014.

Fjalimet e saj në parlament dhe prononcimet për mediat censurohen dhe nuk shpërndahen zyrtarisht nga Partia Demorkatike. Censurë që vjen ndoshta për shkak të debateve dhe kundërshtive të saj me Lulzim Bashën, servilët e të cilit, artikulimin dhe forcën e Jozefinës ndoshta se kuptojnë, apo më keq akoma për inat e censurojnë. Në fakt, mediat online dhe rrjetet sociale, fletushkat e zyrës së shtypit të PD-së i publikojnë edhe kur ato janë recitime bosh dhe retorikë pa kuptim. Do të ishte më mirë sikur në vend të disa papagajve PD të zbardhte dhe të shpërndante fjalën e znj. Topalli apo të tjerë deputetëve të cilët janë nën censurë nga zyra e shtypit në PD, pasi Topalli nuk është e vetme.

Citynews ka publikuar disa ditë më parë edhe censurën ndaj ish-kryeministrit, Sali Berisha, por, menjëherë pas publikimit të lajmit, u hodhën fjalimet e tij.

Është e pafalshme që fjala e deputetes Jozefina Topalli, apo e personave të tjerë me peshë në PD, por edhe me interes në opinionin publik, të censurohet.

Me urdhër apo me papërgjegjshmëri servilizmi, kemi një fakt që tregon se nuk është vetëm Partia Socialiste me mungesë demokracie, por edhe forca më e madhe opozitare në vend, e cila bllokon, pengon dhe censuron zërat e saj më të fortë dhe një pjesë të elitës politike të saj./citynews