Pse i duhet Partia Agrare Agron Dukës ?

28 Mars 2016, 09:13, Aktualitet CNA

Agron Duka, i cili tashmë është kreu i Partisë Agrare në Shqipëri ka një karrierë të gjatë politike e cila fillon si mbështetës i PD-së. Më pas ai kaloi tek Partia Socialiste dhe gjatë qeverisë Nano u bë ministër i bujqësisë. Një nga besnikët e palodhur të ish-kreut socialist, i cili dha edhe dorëheqjen në atë kohë për të krijuar një ngërç qeverisës që shkonte në favor të Fatos Nanons.

Më pas Agron Duka ishte një nga drejtuesit e programit për bujqësi në Partinë Socialiste dhe shumë afër Edi Ramës, por zgjedhjet e vitit 2009 e larguan Dukën nga Rama. Ish-ministri u përplas me kreun socialist dhe pak kohë më pas gjeti strehë tek Partia Republikane e Fatmir Mediut.

Në vitin 2013, Agron Duka kryesoi listën e republikanëve në qarkun e Durrësit duke fituar edhe mandatin e deputetit. Në një kohë kur PD dhe aleatët e saj po pësonin një disfatë, Agron Duka duket triumfues.

Jo shumë kohë larg, por vetëm një vit më parë, Agron Duka u shpall nga Fatmir Mediu si kandidat i republikanëve për Bashkinë e Durrësit. Atëherë u fol edhe për një marrëveshje me kreun demokrat Lulzim Basha, e cila nuk u respektua prej këtij të fundit. Në Durrës u kandidua Grida Duma. Me gjithë mbështetjen e Dukës, humbja e demokratëve ishte katastrofa elektorale e 25 viteve demokraci.

Së fundi, me një lëvizje të shpejtë, Agron Duka shkon tek një parti me profil agrar, të cilën ai e njeh mjaft mirë. Veprimi i Dukës për të marrë drejtimin e një partie politike i jep atij shansin për të qenë një faktor dhe negociator i drejtpërdrejtë në politikë. Tani Duka nuk ka nevojë për negociatat e Mediut apo lejen e Lulzim Bashës. Ai pritet të jetë vetë në aksionin politik. Me apo kundër Ramën, tani e vendos Duka. Pro apo kundër Bashës, sërish vendos Duka. Kreu i agrarëve ishte i qartë në qëndrimin e tij në emisionin Fakt të Çim Pekës tek syri.net. Ai tha se do të qëndrojë në krah të republikanëve deri në fund të mandatit.

Veprimi i Dukës është i qartë. Ai tani nuk është deputeti i një partie të vogël që ka një kryetar dhe disa institucione vendimmarrëse. Ai është kryetar i një partie, e cila në zgjedhjet e ardhshme parlamentare mund të jetë një faktor i rëndësishëm elektoral. Kjo për faktin se Partia Agrare, në disa momente ka mundur të jetë një forcë politike edhe me 4 deputetë në parlament.

Agron Duka duket i qartë në aksionin e tij politik duke mos u sponsorizuar më tej për forca të tjera politike, por duke marrë një parti dhe duke e drejtuar vetë atë. Një veprim që e çon agrarin Duka në një sprovë politike jo shumë të largët. Pas gati një viti ai duhet të ketë dy përballje. I pari do të jetë krahu politik që do zgjedhë për të qenë në koalicion dhe i dyti rezultati i zgjedhjeve.

Zgjedhjet janë afër. Ekuacioni i Dukës do të provohet vitin e ardhshëm./ citynews